"Samsung Galaxy S25 Ultra"nın dizaynı ortaya çıxdı
Samsung 2025-ci ildə təqdim edəcəyi “Galaxy S25” seriyası üzərində işləri davam etdirir. Ancaq təqdimat tarixindən əvvəl cihaz haqqında bir çox məlumat sızdırılıb. Son olaraq, seriyanın ən güclü modeli olan “Galaxy S25 Ultra”nın yeni görüntüləri yayımlanıb.
Sızdırılan görüntülər əvvəlki məlumatların çoxunu təsdiqləyir. “Galaxy S25 Ultra” modelində əvvəlki “Ultra” cihazlarında olan əyri ekran dizaynından imtina edilib və düz ekran seçimi tətbiq edilib. Telefonun alt hissəsində “S-Pen” üçün yuva, USB-C portu, dinamik, mikrofon və SIM kart yeri görünür.
Cihazın ekran/gövdə nisbəti əvvəlki modellərdə olduğu kimi yüksəkdir. Korpusda yuvarlaqlaşdırılmış künclər seçilib. Digər bir fotoda isə ekranda “One UI 7.0” interfeysinə aid şarj bildirişi görsənir ki, bu da cihazın “Galaxy S25 Ultra” olduğunu təsdiqləyir.
Əvvəlki hesabatlara görə, “Galaxy S25 Ultra” modeli bu xüsusiyyətlərlə gələcək:
“Snapdragon 8 Elite” prosessor
Yeni əyri arxa dizayn
200 MP əsas kamera
50 MP ultra-geniş, telefoto və super telefoto kameralar
“Android 15” əsaslı “One UI 7.0” əməliyyat sistemi
Telefonun həmçinin yeddi il ərzində Android yeniləmələri və təhlükəsizlik dəstəyi alacağı gözlənilir. Ölçüləri isə 162,8 x 77,6 x 8,2 mm olacaq ki, bu da “Galaxy S24 Ultra”dan 0,4 mm daha incədir.
“Galaxy S25”, “S25+” və “S25 Ultra” nə vaxt təqdim ediləcək?
Samsung “Galaxy S24” seriyasını 2024-cü ilin yanvarında təqdim edib. Buna görə də, “Galaxy S25” seriyasının 2025-ci ilin yanvarında təqdim olunacağı gözlənilir. Hazırda seriyanın qiymətləri ilə bağlı hər hansı məlumat yoxdur.
Sevinc Abuşova
11:01 28.11.2024
Oxunuş sayı: 48792
