Vətən müharibəsi qəhrəmanlarının övladlarının İstanbulda səfəri təşkil edilib
Azərbaycan və Türkiyə arasında sarsılmaz dostluq, qardaşlıq və strateji əməkdaşlıq münasibətlərinin daha da gücləndirilməsinə xidmət edən növbəti sosial-humanitar layihə həyata keçirilir. Bu çərçivədə Vətən müharibəsi qəhrəmanlarının övladlarının Qarabağ Zəfərinin 5-ci ildönümü münasibətilə İstanbula səfəri baş tutub.
Crossmedia.az xəbər verir ki, səfərin təşkili ilə bağlı layihə Azərbaycan Diasporuna Dəstək Fondunun dəstəyi, “YAŞAT” Fondunun, İstanbul şəhərinin Qaziosmanpaşa Kaymakamlığının və Türkiyə-Azərbaycan Dərnəkləri Federasiyasının (TADEF) tərəfdaşlığı ilə həyata keçirilir.
Noyabrın 9-da başlayan səfərin əsas məqsədi Azərbaycan və Türkiyə şəhid övladları arasında qarşılıqlı dostluq əlaqələrinin möhkəmləndirilməsi, onların sosial inteqrasiyasına və mənəvi inkişafına dəstək göstərilməsi, eyni zamanda iki qardaş ölkə arasında ortaq tarixi, eləcə də milli-mənəvi dəyərlərin təbliği və qorunmasıdır.
Noyabrın 10-da nümayəndə heyətinin üzvləri Türkiyə Cümhuriyyətinin qurucusu Qazi Mustafa Kamal Atatürkün Anım Mərasimində, eləcə də İstanbul şəhərində yerləşən Şəhid Anıl Kaan Aybek adına məktəbdə təşkil olunan xatirə tədbirində iştirak ediblər. Qonaqlar sonra Qaziosmanpaşa Kaymakamlığı Hökumət Konağını ziyarət edib. Qaziosmanpaşa kaymakamı İsgəndər Yöndən şəhid övladları ilə görüşüb. Görüşdə qardaşlıq münasibətlərinin daha da inkişaf etdirilməsi istiqamətində fikir mübadiləsi aparılıb.
Noyabrın 13-dək davam edəcək proqram çərçivəsində iştirakçılar İstanbulun tarixi və mədəni irsini əks etdirən məkanları, muzeyləri və abidələri ziyarət edəcək, həmçinin Azərbaycan və Türkiyə gəncləri arasında mədəniyyətlərarası dialoqun və dostluğun möhkəmlənməsini nəzərdə tutan görüşlərdə iştirak edəcəklər.
Qeyd edək ki, layihə Vətən uğrunda canından keçmiş qəhrəmanlarımızın ailə üzvlərinə göstərilən mənəvi, sosial və ictimai qayğının daha bir bariz nümunəsidir. Layihə həmçinin Azərbaycan-Türkiyə münasibətlərinin “Bir millət, iki dövlət” prinsipi əsasında daha da möhkəmlənməsinə, gələcək nəsillərdə vətənpərvərlik və qardaşlıq hisslərinin gücləndirilməsinə xidmət edir.
15:02 11.11.2025
Oxunuş sayı: 1562
