Yüksəliş hekayəsi
"Yüksəliş" müsabiqəsinin qalibi: Mənim üçün ən böyük qazanc özümü daha dərindən tanımaq oldu - Müsahibə
Artıq bir neçə ildir təşkil olunan "Yüksəliş" layihəsi Azərbaycanda ciddi maraq dairəsində olan bir müsabiqədir. Bu müsabiqənin keçirilməsi və istedadlı kadrların üzə çıxarılması həmçinin onlara sahələrinə uyğun müxtəlif vəzifələrə təyin edilməsi ilə dövlətimiz istedadlı kadrlara önəm verdiyini bir daha göstərir. Bu yarışın qaliblərindən bir çoxu bu gün artıq yüksək vəzifələrdə çalışırlar. Təkcə bunun özü onu deməyə əsas verir ki, “Yüksəliş” idarəetmə prosesində mühüm rol oynamaqla, həm etibarlı, bacarıqlı kadrların tapılmasında, müəyyənləşdirilməsində mühüm rol oynayır. Nəticə etibarilə bu müsabiqənin nəticəsində hər il xeyli sayda aktiv və peşəkar kadrları aşkara çıxarır ki, buda istedadlı şəxslərin daha da parlamsına səbəb olur.
Crossmedia.az məsələnin aktuallığını nəzərə alaraq “Yüksəliş” hekayəsi” rubrikası çərçivəsində qaliblərlə silsilə müsahibələri davam etdirir. Növbəti müsahibimiz İnsafəli Səmədovdur.
— İnsafəli bəy ilk sualımız giriş xarakterli olacaq: zəhmət olmasa, özünüz haqqında məlumat verərdiniz.
— İlk növbədə, göstərilən diqqət və uğur arzularına görə təşəkkür edirəm. Mən hazırda təlim və konsultasiya şirkətində çalışıram. Əsas fəaliyyətim insanların inkişafına dəstək olmaq, onların bilik və bacarıqlarının artırılmasına yönəlmiş proqramlar hazırlamaqdır. Eyni zamanda təlimçi kimi çıxış edir, Təlim və Məhsul İnkişaf şöbəsinin rəhbəri vəzifəsini icra edirəm. Buradakı əsas məqsədim yeni təlimçilərin hazırlanması, maraqlı və interaktiv təlim proqramlarının qurulmasıdır. Şirkətim isə beynəlxalq təlim və konsultasiya mərkəzi olan Develor Azərbaycandır.
— Ümumiyyətlə, necə oldu ki, "Yüksəliş" müsabiqəsinə qatıldınız? Sizdə bu ideya haradan yarandı?
— Müsabiqə haqqında məlumatı ilk dəfə həyat yoldaşımdan öyrəndim. O, bir neçə dəfə iştirak etmişdi. Mən isə əvvəlcə sadəcə onu müsabiqəyə müşayiət edən kimi qatılırdım. Daha sonra həyat yoldaşım mənə də qoşulmağı tövsiyə etdi. İlk dəfə sınaq məqsədilə iştirak etdim, ikinci dəfə isə artıq daha hazırlıqlı şəkildə qatıldım və qalib oldum. Düzünü desəm, müsabiqədə qalib gəlməkdən əlavə, mənim üçün ən böyük qazanc özümü daha dərindən tanımaq oldu. Çünki müsabiqə insanın güclü və zəif tərəflərini üzə çıxarır. İlk dəfə başa düşdüm ki, hələ qalibiyyət üçün tam hazır deyiləm. Bu da məni daha çox öyrənməyə və inkişaf etməyə həvəsləndirdi. Xüsusilə də menecment sahəsində öz üzərimdə daha çox çalışdım.
— Maraqlıdır, bəzən deyirlər ki, "Yüksəliş" müsabiqəsində yalnız xaricdə təhsil alanlar qalib olur, ölkədə təhsil alanlar isə uğur qazana bilmir. Siz bu barədə nə düşünürsünüz?
— Məncə, bu, yanlış bir fikirdir. Çünki faktlar göstərir ki, həm xaricdə, həm də Azərbaycanda təhsil almış iştirakçılar qalib ola biliblər. Mən özüm xaricdə oxumamışam, təhsilimin əsas hissəsini Azərbaycanda almışam. Düzdür, ikili diplom proqramı çərçivəsində Şotlandiyanın Heriot-Watt Universitetinin də diplomunu əldə etmişəm, amma dərslərin böyük hissəsi Bakıda, Azərbaycan professorlarının iştirakı ilə keçirilib. Deməli, xaricdə oxumadan da uğur qazanmaq mümkündür. Əsas məsələ insanın öz üzərində işləməsi və hazırlığıdır.
— Müsabiqə zamanı elə bir an oldumu ki, qalib gələcəyinizə tərəddüd etdiniz?
— Ən çox tərəddüdü final mərhələsində hiss etdim. Çünki burada 100-dən çox iştirakçı var idi və hamısı kifayət qədər güclü, hazırlıqlı insanlar idi. Belə bir mühitdə özünü qalib görmək, əlbəttə, asan deyil. Mən yalnız özümün kifayət qədər hazırlıqlı olduğumu bilirdim, amma digər iştirakçıların da gücü və bilikləri çox yüksək idi. Ona görə də “mütləq qalib olacağam” düşüncəsi yox idi.
— Dövlət İmtahan Mərkəzinin suallarına münasibətiniz necədir?
— Bildiyiniz kimi, müsabiqənin mərhələləri müxtəlifdir. İlk mərhələdə bilik yoxlanılır, ikinci mərhələdə intellekt testləri keçirilir, üçüncü mərhələdə isə idarəetmə bacarıqları situativ suallarla qiymətləndirilir. Mən düşünürəm ki, bu suallar kifayət qədər keyfiyyətli hazırlanır və beynəlxalq təcrübəyə əsaslanır. Təbii ki, hər testin öz məhdudiyyətləri var. Məsələn, insan testdə uğursuz ola bilər, amma real həyatda çox güclü lider ola bilər. Amma minlərlə iştirakçı arasından ən yaxşılarını seçmək üçün belə filtrlər mütləqdir.
— Sizcə, gənclər niyə bu müsabiqəyə qatılmalıdırlar?
— Mən deyərdim ki, təkcə gənclər yox, hər kəs iştirak edə bilər. Çünki bu, sadəcə bir müsabiqə deyil, həm də inkişaf imkanları təqdim edən bir platformadır. Birincisi, müsabiqə insanda müsbət stres yaradır, bu isə onu daha da irəli aparır. İkincisi, iştirakçı öz güclü və zəif tərəflərini daha yaxından görür, inkişaf üçün yeni istiqamətlər müəyyənləşdirir. Üçüncüsü isə geniş bir şəbəkə – yeni tanışlıqlar, peşəkar əlaqələr qazanır. Bunların hər biri çox dəyərli təcrübədir.
— Son olaraq, bir qalib kimi növbəti müsabiqələrdən gözləntiləriniz və təklifləriniz nələrdir?
— Qaydalara əsasən, qalib olan şəxs növbəti illərdə iştirak edə bilmir. Ona görə də şəxsi gözləntim yoxdur. Amma ümumi təklifim budur ki, finalçılar üçün də daha çox tədbirlər, şəbəkələşmə imkanları təşkil olunsun. Çünki qaliblər üçün nəzərdə tutulmuş proqramlar kifayət qədər genişdir, lakin finalçılar da bu prosesin bir parçası olaraq daha aktiv şəkildə cəlb oluna bilərlər. Bu həm onların inkişafına, həm də müsabiqənin təsir dairəsinin genişlənməsinə xidmət edər.
Elmir Heydərli
12:00 21.09.2025
Oxunuş sayı: 2137
