Azərbaycan-Çin əməkdaşlığı: Yeni iqtisadi dəhlizlərin yaranmasına müsbət təkan verilir
Azərbaycan və Çin Xalq Respublikası arasında dövlətlərarası münasibətlər uğurla inkişaf edir. Rəsmi Bakı və Pekinin əlaqələri müasir beynəlxalq əməkdaşlıq nümunələri arasında xüsusi çəkiyə malikdir və bu uğurlu inkişaf modeli hər iki ölkənin milli maraqlarına xidmət etməklə yanaşı, regional və qlobal miqyasda iqtisadi tərəqqiyə, sülh və sabitliyə əsaslı töhfələr verir.
Cənab Prezident İlham Əliyevin Çinə işgüzar səfəri, onun və birinci xanımın qarşılanma mərasimi sadəcə diplomatik protokol qaydası deyildi, məhz ölkəmizə göstərilən yüksək etimadın və hörmətin təzahürü idi.
Bu, belə də olmalıdır. Söhbət dünyanın iki fərqli qütbündə yerləşən, iki supergüclə yüksək səviyyəli və qarşılıqlı faydalı dialoq quran dövlətin liderindən gedir. Prezident İlham Əliyevin diplomatik portreti, heç şübhəsiz, hər kəsin diqqət mərkəzindədir. Görüş zamanı Si Cinpinin dövlət rəhbərimizə müraciət nitqinə "mənim əziz dostum" ifadəsi ilə başlaması Çin liderinin mövcud əlaqələrə necə həssaslıqla yanaşmasının göstəricisidir.
Bakı və Pekin münasibətlərinin tarixi kökləri Qədim İpək Yoluna qədər uzansa da, əlaqələrin institusional əsasını Azərbaycanın müstəqilliyini bərpa etdikdən sonra qurulan diplomatik münasibətlər təşkil edir. Cənab Prezident İlham Əliyev və Si Cinpin arasında davamlı siyasi dialoq və yüksək səviyyəli görüşlər ikitərəfli əlaqələrin dinamik inkişafını səciyyələndirir.
Rəsmi Bakı və Pekinin tərəfdaşlıq portfeli olduqca geniş və əhatəlidir. Çinin texnoloji, iqtisadi və hərbi üstünlüyü bizim üçün cəlbedicidirsə, Azərbaycanın da coğrafi mövqeyi, enerji və nəqliyyat potensialı, eyni zamanda investisiya mühitinin əlverişli olması Çinin diqqət mərkəzindədir.
Təbii ki, iqtisadi əməkdaşlıq hazırda Bakı və Pekin münasibətlərinin aparıcı istiqamətini təşkil edir. Çinin məşhur "Bir kəmər, bir yol" təşəbbüsü ilə Azərbaycanın "Orta Dəhliz" strategiyasının vəhdəti hər iki ölkənin iqtisadi-ticari maraqlarını uzlaşdırır.
Bakı - Tbilisi - Qars dəmir yolu, Bakı Beynəlxalq Dəniz Ticarət Limanı, Transxəzər Beynəlxalq Nəqliyyat marşurutu və ən son olaraq Zəngəzur dəhlizi ilə bağlı müsbət tendensiya Cənubi Qafqazı məhz nəqliyyat qovşağına çevirir. Buda öz növbəsində Çinin diqqətinin regiona fokuslanmasını stimullaşdırır.
Prezidentin Çin səfərinin həm də Azərbaycanın Şanxay Əməkdaşlıq Təşkilatında (ŞƏT) rolunu artırmaq baxımından olduqca əhəmiyyətlidir. Ölkəmiz hazırda ŞƏT - nın dialoq tərəfdaşıdır və təşkilata tamhüquqlu üzv olmaq niyyətindədir. Çünki ŞƏT-də iştirak Pekinlə əlaqələrin mühüm elementidir. Bu isə geniş spektrdə Azərbaycanın xarici siyasət istiqamətinin Asiya seqmentini aydınlaşdırır. Nəticədə etibarilə, Bakı və Pekinin formalaşdırdığı əməkdaşlıq modeli yeni iqtisadi dəhlizlərin yaranmasına müsbət təkan verir.
Pərviz Mirizadə,
Siyasi şərhçi
17:08 31.08.2025
Oxunuş sayı: 3637
