Bakı şəhərində internet problem yaşandı – Mütəxəssis rəyi
Ölkə ərazisində internetlə bağlı problem yaranıb.
Mövzu ilə bağlı İnnovasiya üzrə mütəxəssis Bəxtiyar Həsənov Crossmedia.az-a açıqlama verib. Bəxtiyar Həsənov bildirib ki, internetdəki çətinliklərin səbəbləri vaxtında müəyyən edilməli və aradan qaldırılmalıdır: "İnternetlə bağlı müşahidə olunan çətinliklərin müxtəlif mənbələri ola bilər. Ən çox belə hallara şəbəkə avadanlıqlarında aparılan texniki işlər, beynəlxalq bağlantılarda yaranan qısa fasilələr və ya region üzrə yeni infrastruktur işlərinin aparılması səbəb ola bilir. Əsas məsələ bu halların səbəblərinin vaxtında müəyyən olunması və aradan qaldırılmasıdır".
Mütəxəssis qeyd edib ki, gələcəkdə internet infrastrukturunun optimal səviyyədə qalması üçün yeni xətlərin təkmilləşdirilməsi zəruridir və bu, “Trans-Kaspian Submarine Cable” layihəsi kimi təşəbbüslərlə təmin olunur: "Eyni zamanda gələcəkdə də ölkədə internet şəbəkəsi infrastrukturunun daim optimal qalması üçün yeni istiqamətlərdə xətlərin təkmilləşdirilməsi zəruri əhəmiyyət daşıyır. Məsələn, “Trans-Kaspian Submarine Cable” və ya ən çox bilinən adı ilə “Digital Silk Way” (Rəqəmsal İpək Yolu) layihəsinin əhəmiyyəti bu kimi hallarda daha çox xatırlanır. Hətta artıq sahil araşdırmalarının tamamlandığını, kabelin yerləşdiriləcəyi manşon və terminal nöqtələrin müəyyənləşdirildiyini, dəniz dibinin xəritələşdirilməsi üçün işlərin başlandığını bilirik. Yəni bugünkü qısa fasilələri daha çox texniki proseslərin və inkişaf mərhələlərinin bir hissəsi kimi qəbul etmək olar".
B.Həsənov sonda deyib: "Vacib olan bu kimi neqativ halların ardıcıl və sistemli bir şəkildə araşdırılması və həll olunmasıdır ki, istifadəçilərin gündəlik fəaliyyəti minimum dərəcədə təsirlənsin. Hazırda ölkənin internet şəbəkəsi çoxsaylı texnoloji və coğrafi amillərə bağlı olduğu üçün konkret bir rəy bildirməkdən daha çox, rəsmi qurumların açıqlaması əsasında dəyərləndirmək daha məntiqli seçim olacaq".
Fatimə Nəbiyeva
16:59 21.08.2025
Oxunuş sayı: 646
