Məşhur şahmatçı Vüqar Həşimovun doğum günüdür
Bu gün Azərbaycanın tanınmış şahmatçısı, şahmat üzrə üçqat Azərbaycan çempionu Vüqar Həşimovun doğum günüdür.
Vüqar Həşimov 1986-cı il iyulun 24-də Bakıda anadan olub. O, karyerası ərzində dörd dəfə — 2002, 2004, 2006 və 2008-ci illərdə keçirilən şahmat olimpiadalarında Azərbaycan milli komandası adından çıxış edib. 2009-cu ilin 7–9 may tarixlərində Bakıda keçirilən Heydər Əliyev Kuboku çərçivəsində dünya yığması ilə qarşılaşmada da ölkəmizi təmsil edib. Həmin il Azərbaycan yığmasının heyətində Avropa Çempionu adını qazanıb.
2010-cu ildə keçirilən Şahmat Olimpiadasına yerli federasiya ilə yaşadığı münaqişəyə görə milliyə dəvət almayıb.
2007-ci ildə Avropa çempionatında bürünc medal qazanan Həşimov, 2009-cu ildə yığmamıza son turda həlledici xalı qazandıraraq Avropa çempionu titulunun əldə olunmasında mühüm rol oynayıb. 2011-ci ildə isə Avropa çempionatının gümüş medalını əldə edib. Həmin illərdə İtaliyada müntəzəm keçirilən “Reggio Emilia” turnirində də qalib olub.
2011-ci ildə Rusiyanın Xantı-Mansiysk şəhərində təşkil olunan Dünya Kubokunda 1/4 final mərhələsində mübarizəni dayandıran şahmatçı, həmin ilin noyabrında Yunanıstanın Porto Karras şəhərində keçirilmiş Avropa çempionatında da iştirak edib. Azərbaycan yığması bu yarışda gümüş medal qazanıb.
Vüqar Həşimov uzun müddət beyindəki bədxassəli şiş səbəbilə müalicə alırdı. Təəssüf ki, 2014-cü il yanvarın 11-də Almaniyanın Haydelberq şəhərində yerləşən klinikada vəfat edib. Yanvarın 14-də isə III Fəxri Xiyabanda dəfn olunub.
Mərhum qrossmeysterin xatirəsi daim yaşadılır. 2014-cü ilin aprel ayında onun adını daşıyan beynəlxalq şahmat turniri – “Vüqar Həşimov Memorialı” ilk dəfə Şəmkirdə təşkil olunub və hər il davam etdirilir.
2016-cı ildə Bakıda Vüqar Həşimov Şahmat Akademiyası fəaliyyətə başlayıb.
Həmçinin, 2014-cü ilin iyulun 24-də onun qəbirüstü abidəsinin açılışı olub və mərhum şahmatçının xatirəsinə bürüncdən hazırlanmış heykəl ucaldılıb.
Azərbaycan Respublikasının Prezidenti İlham Əliyev çıxışında Vüqar Həşimovun ölkə idmanına göstərdiyi xidmətləri yüksək qiymətləndirib.
Ayan Sədi
14:58 24.07.2025
Oxunuş sayı: 15115
