"Zərif poeziyanın güclü səsi - Nigar Rəfibəyli"
Bu gün Azərbaycan poeziyasının incə duyğulu, zərif və milli düşüncəli simalarından biri olan Nigar Rəfibəylinin vəfatının ildönümüdür. Qəlbi ilə xalqının dərdini bölüşən, qələmi ilə azadlıq, gözəllik və haqq uğrunda mübarizə aparan bu istedadlı şairə 1981-ci il iyulun 9-da dünyasını dəyişmiş, II Fəxri Xiyabanda dəfn olunmuşdur.
1913-cü ildə Gəncə şəhərində anadan olan Nigar Rəfibəyli ilk təhsilini Bakı Pedaqoji Texnikumunda almış, daha sonra Moskvada Pedaqoji İnstitutda təhsilini davam etdirmişdir. Hələ gənc yaşlarından ədəbi mühitdə tanınmağa başlamış, 1928-ci ildə "Çadra" adlı ilk şeiri "Dan ulduzu" jurnalında dərc edilmişdir. Onun 1934-cü ildə çapdan çıxan ilk "Şerlər" kitabı Azərbaycan qadınlarının cəmiyyətdəki fəallığını, yeni həyat tərzinə uyğun mübarizələrini əks etdirirdi.
Nigar Rəfibəyli həm də ictimai-siyasi proseslərə duyarlı bir sənətkar idi. "Dolores İbarruri", "Cəmilə" kimi şeirlərində o, dünya xalqlarının azadlıq uğrunda apardıqları mübarizələrə səmimi dəstək ifadə etmişdir. Onun poeziyasında həm vətən sevgisi, həm də qadının daxili gücü və zərifliyi xüsusi yer tutur.
O, eyni zamanda Azərbaycan ədəbiyyatına və dünya klassikasına xidmət etmiş tanınmış tərcüməçidir. Məhsəti Gəncəvinin rübailəri, Evripid, Şiller, Çexov, Voyniç, Puşkin, Lermontov və digər klassiklərin əsərlərini Azərbaycan dilinə böyük ustalıqla çevirmişdir. Əsərləri bir sıra xarici dillərə də tərcümə olunmuş, poeziyası sərhədləri aşaraq beynəlxalq müstəviyə çıxmışdır.
Xidmətlərinə görə orden və medallarla, o cümlədən "Şərəf" nişanı ilə təltif olunmuşdur.
Ayhan
15:20 09.07.2025
Oxunuş sayı: 9701
