BMT çərçivəsində qadınlarla bağlı forum keçiriləcək
Laçında baş tutan İqtisadi Əməkdaşlıq Təşkilatının (ECO) Qadınlar Forumu təkcə regional əməkdaşlıq tədbiri deyil, həm də qadınların cəmiyyətdə rolunun gücləndirilməsinə dair qlobal səviyyəli dialoqa çevrildi. Forum çərçivəsində BMT Baş katibinin müavini, təşkilatın Dayanıqlı İnkişaf Qrupunun sədri Amina Mohammed-in video-müraciəti təqdim olunub. O, tədbirin əhəmiyyətini vurğulayaraq bildirib ki, Laçında keçirilən bu Forum sadəcə bir görüş yox, mühüm bir bəyanat və əməkdaşlığa çağırışdır. Amina Mohammed çıxışında ötən il Bakıda keçirilən COP29-un da bu istiqamətdə əhəmiyyətli irəliləyiş olduğunu qeyd edib. O bildirib ki, tədbirdə trilyonlarla dollar həcmində maliyyə vəsaitinə ehtiyac duyulduğu vurğulanıb və bu vəsaitlərin artıq müəyyən hissəsi ayrılıb. Bu proses, həmçinin, dövlət səviyyəsində hazırlanmış Milli Töhfələr Sənədinin inklüziv yanaşmalar əsasında tərtibinə şərait yaradıb.
Crossmedia.az xarici mediaya istinadən bildirir ki, Amina Mohammed öz müraciətində qadınların innovasiya və yaşıl iqtisadiyyat sahəsində mühüm rol oynamalı olduqlarını xüsusi vurğulayıb. O qeyd edib ki, qadınlar təhsil sahəsində transformasiya yaratmalı və öz ölkələrinin inkişafında aparıcı qüvvəyə çevrilməlidirlər. “Əgər biz cəmiyyətdə real dəyişikliklərə nail olmaq istəyiriksə, qadınların təhsilə bərabər çıxışı təmin edilməlidir,” – deyə o əlavə edib. Amina Mohammed qadınların dövlət idarəçiliyi, özəl sektor və sahibkarlıq sahələrində də fəal iştirakının vacibliyini bildirib. Onun fikrincə, qadınlar gələcəyin formalaşdırılmasında əsas aktorlardan biridir və gender bərabərliyinin təmin olunması bu baxımdan prioritet məsələdir.
O, həmçinin, ötən ilin sentyabr ayında BMT çərçivəsində qadınların dayanıqlı inkişafdakı rolu ilə bağlı xüsusi sənədin qəbul edildiyini diqqətə çatdırıb. Bu ilin oktyabr ayında isə BMT çərçivəsində növbəti beynəlxalq forumun keçiriləcəyi və bu tədbirin qlobal həmrəyliyin təzahürü olacağı bildirilib. Amina Mohammed çıxışının sonunda qadınların liderlik roluna verdikləri töhfəyə görə minnətdarlığını ifadə edib və cəmiyyətin daha ədalətli və inklüziv olması üçün birgə səylərin vacibliyini vurğulayıb.
11:36 02.07.2025
Oxunuş sayı: 666
