YAP Yasamal rayon təşkilatında Qurban bayramı münasibətilə tədbir keçirilib
YAP Yasamal rayon təşkilatı tərəfindən keçirilən tədbirdə YAP Yasamal rayon təşkilatının sədri Bəxtiyar Nəbiyev, şəhid ailə üzvləri, YAP Yasamal rayon təşkilatının və Yasamal Rayon İcra Hakimiyyətinin əməkdaşları, YAP Yasamal rayon ərazi partiya təşkilatlarının sədr, sədr müavinləri iştirak edib.
YAP Yasamal rayon təşkilatının sədri Bəxtiyar Nəbiyev çıxış edərək bildirib ki, bu gün biz müqəddəs Qurban bayramını qalib xalqın nümayəndələri kimi qeyd edirik. Bu bayram artıq yalnız mənəvi təmizlik, paylaşmaq, mərhəmət rəmzi ilə yanaşı həm də milli qürurumuzu, dövlətimizin qüdrətini nümayiş etdirən bir gündür. Əldə etdiyimiz tarixi zəfərlər sayəsində digər bayramlar kimi bu bayram azad Qarabağda – əzəli torpaqlarımızda yüksək ruhla, milli birliklə qeyd olunur. Bu, həm də dövlətimizin gücünün, Prezident İlham Əliyevin qətiyyətli siyasətinin bəhrəsidir. Ulu öndər Heydər Əliyevin əsasını qoyduğu dövlətçilik strategiyası bu gün öz ən parlaq nəticələrini verir. Azərbaycanda sabitlik, inkişaf, sosial rifah Qurban bayramının sevincini daha da artırır. Qeyd olunub ki, bu gün şəhid və aztəminatlı ailələrin rifahı ölkə rəhbərliyinin sosial siyasətində əsas istiqamətlərdən biridir. Prezident İlham Əliyev və Birinci vitse-prezident Mehriban xanım Əliyeva hər zaman şəhid və aztəminatlı ailələrə diqqət və qayğı göstərirlər. Göstərilən diqqət və qayğı bu ailələrin həyatına ümid, ölkəmizə isə sonsuz inam bəxş edir. Qoy bu bayram xalqımıza yeni uğurlar, torpaqlarımıza firavanlıq gətirsin! Çıxışının sonunda Bəxtiyar Nəbiyev qarşıdan gələn müqəddəs Qurban bayramı münasibətilə tədbir iştirakçılarını təbrik edib.
Çıxış edən Yasamal Rayon İcra Hakimiyyəti Vətən müharibəsi iştirakçıları və şəhid ailələri ilə işin təşkili şöbəsinin müdiri Samir İsmiyev vurğulayıb ki, Qurban bayramı təkcə dini mərasim deyil, həm də mənəvi oyanış günüdür. Bu oyanışın dərinliyində milli kimliyimiz, tariximiz və ideallarımız dayanır. Ulu öndər Heydər Əliyev din və dövlət münasibətlərini əsaslı şəkildə quraraq milli-mənəvi dəyərlərimizin qorunmasını təmin etdi. Müstəqil Azərbaycanda bayramlar azad və firavan şəkildə qeyd olunur. Prezident İlham Əliyev bu siyasəti uğurla davam etdirir. İnkişaf edən iqtisadiyyat, möhkəmlənən ordu və sosial rifah siyasəti – bunlar xalqımıza sabitlik və bayram sevincini təmin edir. Bayramlar indi daha əzəmətli, daha əhatəli keçirilir.
Çıxış edən 44 günlük Vətən müharibəsi şəhidi, XTQ-nin kapitanı Nurlan Mustafayevin anası, YAP Yasamal rayonu “Hüseyn Cavid 33A”(“Bakı Metropoliteni” QSC) ünvanı üzrə ərazi partiya təşkilatının sədr müavini Rahilə Ramazanova bildirib ki, Qurban bayramı mənəviyyatımızın, mərhəmət və həmrəyliyin təntənəsidir. Azərbaycan dövləti bu müqəddəs dəyərlərə sadiqliyini daim nümayiş etdirir. Ulu öndər Heydər Əliyevin müəyyən etdiyi milli dəyərlərə əsaslanan yol davam edir. Onun siyasi irsi bayramlarımızı da gücləndirən mənəvi dayağa çevrilib. Prezident İlham Əliyev uğurlu fəaliyyəti ilə bu ənənələri yaşayır və bu istiqamətdə mühüm addımlar atılır. Bayram günlərində şəhid və aztəminatlı ailələrinə dəstək siyasəti bu qayğının göstəricisidir. Azərbaycanın sabitliyi, inkişafı bayram əhvalını daha da yüksəldir.
YAP Yasamal rayonu AMEA Folklor İnstitutu üzrə ərazi partiya təşkilatının sədri İlhamə Qəsəbova bildirib ki, Qurban bayramı paylaşmaq, ehtiyac sahiblərini unutmamaq çağırışıdır. Azərbaycan dövləti bu çağırışlara konkret addımlarla cavab verir. Ulu öndər Heydər Əliyev insan amilini siyasətin mərkəzinə qoydu. Onun bu yanaşması bayramların da mahiyyətində öz əksini tapdı. Əhalinin sosial müdafiəsi, aztəminatlı və şəhid ailələrinə dəstək siyasəti formalaşdı. Prezident İlham Əliyevin rəhbərliyi ilə bu siyasət inkişaf edərək yeni mərhələyə qədəm qoyub. Qeyd olunub ki, hər bir şəhid və aztəminatlı ailənin bayram sevincini yaşaması dövlətin diqqətindədir. Bayram süfrələrinin bolluğu sabitliyin, rifahın göstəricisidir.
Çıxışlardan sonra xatirə şəkli çəkdirilib.
Tədbirdən sonra YAP Yasamal rayon təşkilatı tərəfindən Qurban bayramı münasibətilə aksiya təşkil olunub. Aksiya çərçivəsində Yasamal rayonunda yaşayan şəhid və aztəminatlı ailələr ziyarət olunub və onlara bayram sovqatları təqdim edilib. Şəhid və aztəminatlı ailələr onlara göstərilən diqqət və qayğıya görə Prezident cənab İlham Əliyevə və Birinci vitse-prezident Mehriban xanım Əliyevaya dərin minnətdarlıqlarını ifadə ediblər.
Qurban bayramınız mübarək!
16:45 04.06.2025
Oxunuş sayı: 2733
