Üç tərəfli zirvə görüşü yeni siyasi nizamda xüsusi rol oynayacaq
Ölkə Prezidenti cənab İlham Əliyevin dünya səviyyəsində həyata keçirdiyi balanslaşdırılmış xarici siyasəti Azərbaycanı inkişaf etmiş demokratik ölkələr sırasına çıxarmaqla mövqeyini möhkəmləndirib. Azərbaycanın müstəqil, demokratik, azad eyni zamanda qalib ölkə olaraq dünya birliyindəki nüfuzu daha da artıb. Azərbaycanın sülhsevər, demokratik proseslərin inkişafına xüsusi önəm yetirən müstəqil dövlət olması barədə beynəlxalq aləmdə müsbət rəy formalaşdı və möhkəm inam yarandı. Beynəlxalq və regional təşkilatlarla aparılan ardıcıl və məqsədyönlü iş Azərbaycanın ötən illər ərzində beynəlxalq aləmdə etibarlı tərəfdaş kimi qəbul edilməsində xüsusi rol oynayıb.
Azərbaycan son illərdə xarici siyasətində "orta güc" strategiyasını inkişaf etdirərək regional və qlobal arenada öz nüfuzunu artırmağa çalışır. Bu strategiya ölkənin regional əməkdaşlıq və beynəlxalq təşkilatlarda daha fəal rol almasını, strateji müttəfiqliklər qurmasını və iqtisadi-mədəni inteqrasiyanı genişləndirməsini əhatə edir. Laçında keçirilən Azərbaycan, Türkiyə və Pakistan prezidentlərinin zirvə görüşü bu siyasətin ən bariz nümunələrindən biridir.
Azərbaycanın Qoşulmama Hərəkatına sədrliyi və bu çərçivədə həyata keçirdiyi təşəbbüslər onun beynəlxalq arenada balanslı və çoxvektorlu siyasətini nümayiş etdirir. Türkiyə və Pakistanla möhkəm əlaqələr isə Azərbaycanın regional güc mövqeyini daha da möhkəmləndirir. Qarabağ müharibəsi zamanı hər iki ölkənin Azərbaycana siyasi və mənəvi dəstəyi, onların strateji tərəfdaşlıq çərçivəsində sıx əməkdaşlığının davam etdiyini göstərir.Zirvə görüşü zamanı enerji və nəqliyyat xətlərinin inkişafı, xüsusən də Zəngəzur dəhlizinin əhəmiyyəti ön plana çıxarıldı. Bu dəhliz yalnız Azərbaycanın deyil, bütün regionun iqtisadi potensialını artıracaq və üç ölkə arasında iqtisadi inteqrasiyanı dərinləşdirəcək.Zirvə görüşündə əsas müzakirə mövzuları regional əməkdaşlıq, ticarət əlaqələrinin genişləndirilməsi, enerji və infrastruktur layihələri, nəqliyyat dəhlizləri və müdafiə sənayesi sahəsində birgə təşəbbüslər oldu. Liderlər həmçinin Qarabağın bərpası və bölgədə davamlı sülhün təmin olunması ilə bağlı fikir mübadiləsi apardılar.Prezident Rəcəb Tayyib Erdoğan çıxışında Türkiyənin hər zaman Azərbaycanın yanında olduğunu vurğulayaraq, “Laçın görüşü Türk dünyasının gücünü və birliyini bir daha dünyaya nümayiş etdirir,” dedi. Baş nazir Şahbaz Şərif isə Pakistanın Azərbaycanla tarixi və qardaşlıq münasibətlərinə sadiqliyini bildirdi və Laçın kimi strateji əhəmiyyətli bir bölgədə olmaqdan məmnunluğunu ifadə etdi.Görüş zamanı tərəflər arasında müxtəlif sahələr üzrə əməkdaşlıq sənədləri imzalandı. Bu əməkdaşlıqlar Azərbaycan, Türkiyə və Pakistan arasında siyasi, iqtisadi və təhlükəsizlik sahələrində birgə fəaliyyətlərin daha da genişləndirilməsini nəzərdə tutur.Bu görüş təkcə diplomatik baxımdan deyil, həm də simvolik olaraq mühüm əhəmiyyət daşıyır. Qarabağ müharibəsindən sonra Azərbaycanın nəzarətinə qaytarılan Laçının bu cür yüksək səviyyəli tədbirlərə ev sahibliyi etməsi, bölgənin təhlükəsizliyinin və sabitliyinin təmin olunduğunu göstərir. Bu da onu göstərir ki, Laçın təkcə Azərbaycanın deyil, həm də bütün Türk və İslam dünyasının sülh və həmrəyliyinin rəmzinə çevrilir.
Nicat İsmayılov
YAP Yasamal rayonu “Akim Abbasov küç.73E” ünvanı üzrə ərazi partiya təşkilatının sədri
13:38 30.05.2025
Oxunuş sayı: 15615
