Sosium

Türk Tərəfdaşlığında Azərbaycanın rolu

21 may 2025-ci il tarixində Budapeştdə keçirilən Türk Dövlətləri Təşkilatının Dövlət başçılarının qeyri-rəsmi Zirvə görüşü müasir geosiyasi şərtlər fonunda regional və qlobal əməkdaşlığın dərinləşdirilməsi istiqamətində mühüm hadisə kimi yadda qaldı. Azərbaycan Respublikasının Prezidenti cənab İlham Əliyevin çıxışı bu görüşdə strateji baxış və çoxtərəfli əməkdaşlıq imkanlarının konturlarını aydın şəkildə ortaya qoydu. Qeyd edim ki, Azərbaycan ilə Macarıstan arasında formalaşan siyasi və iqtisadi münasibətlər bütövlükdə regionun inkişafına təkan verən nümunəvi model kimi qiymətləndirilə bilər. Prezident İlham Əliyevin ifadə etdiyi kimi, Macarıstan Azərbaycanın etibarlı strateji tərəfdaşı olmaqla yanaşı, müstəqil xarici siyasət yürüdən, artan beynəlxalq nüfuza malik dövlətdir. İki ölkə rəhbərləri arasında intensiv qarşılıqlı səfərlər, əməkdaşlığın dərinliyini və davamlılığını təsdiqləyir. Bu Zirvə görüşü eyni zamanda Türk Dövlətləri Təşkilatının institusional inkişafı baxımından da mühüm mərhələdir. Şuşada baş tutmuş ilk qeyri-rəsmi Zirvə görüşündən sonra bu görüşün təşkili, Azərbaycan tərəfindən irəli sürülən təşəbbüslərin davamlılığına və təsirliliyinə dəlalət edir. Prezident İlham Əliyev, təşkilatın sədri olan Qırğızıstanı və onun rəhbəri Prezident Sadır Japarovu təbrik edərək regional əməkdaşlığın uğurlu davam etdirilməsinin vacibliyini qeyd etdi. Bu il isə rəsmi Zirvə görüşünə Azərbaycan ev sahibliyi edəcək. Nəqliyyat və logistika sahəsində əldə edilən nailiyyətlər Azərbaycanın geosiyasi mövqeyini daha da gücləndirir. Qeyd olunduğu kimi, açıq dənizlərə çıxışı olmayan Azərbaycanın Avrasiyanın nəqliyyat-logistika mərkəzlərindən birinə çevrilməsi uzunmüddətli və strateji yanaşmanın nəticəsidir. Bakı-Tbilisi-Qars dəmir yolu xəttinin yükdaşıma qabiliyyətinin artırılması, rəqəmsal platformaların hazırlanması və Xəzər dənizi limanlarının koordinasiyası bu sahədə həyata keçirilən kompleks tədbirləri əhatə edir. Zirvə çərçivəsində diqqət çəkən mühüm məqamlardan biri də COP29-un uğurlu təşkili və nəticələri oldu. Azərbaycan bu qlobal tədbirə cəmi 11 ayda yüksək səviyyədə ev sahibliyi etməklə beynəlxalq platformalarda liderliyini bir daha nümayiş etdirdi. Karbon bazarlarının tənzimlənməsi və inkişaf etməkdə olan ölkələr üçün yeni maliyyə hədəflərinin razılaşdırılması Azərbaycanın qlobal çağırışlara verdiyi cavabın sübutudur. Nəticə etibarilə, Azərbaycan bu Zirvə görüşündə həm Türk dünyasında, həm də beynəlxalq aləmdə özünü təşəbbüskar, ardıcıl və möhkəm tərəfdaş kimi bir daha təsdiqlədi. Bu çıxış, Azərbaycanın artan nüfuzunun və multilateral diplomatiyasının uğurlu göstəricisidir.