İkitərəfli əlaqələrdə müsbət dinamika
2025-ci il mayın 20-də Azərbaycan Respublikasının Prezidenti İlham Əliyev Macarıstanda rəsmi səfəri çərçivəsində Baş nazir Viktor Orbanla görüşdən sonra birgə mətbuat konfransında bəyanatla çıxış etdi. Prezidentin bəyanatında bir neçə vacib istiqamətə toxunuldu. Əvvəla, İlham Əliyev Macarıstanla Azərbaycan arasında mövcud olan strateji tərəfdaşlıq münasibətlərini xüsusi vurğuladı. O, Macarıstanın beynəlxalq arenada, xüsusilə də Avropa İttifaqı çərçivəsində müstəqil siyasət yürütməsini yüksək qiymətləndirdi və bu siyasətin Azərbaycanın maraqları ilə üst-üstə düşdüyünü qeyd etdi. Bu yanaşma, Azərbaycanın da milli maraqlara əsaslanan xarici siyasətinə uyğun gəlir və iki ölkə arasında qarşılıqlı etimada əsaslanan münasibətlərin dərinləşməsini təmin edir.
Prezident Əliyevin çıxışında diqqət çəkən digər bir məqam enerji əməkdaşlığı məsələləri idi. O, Azərbaycanın təkcə neft və qaz ixracatçısı deyil, həm də yaşıl enerji sahəsində perspektivli layihələrin təşəbbüskarı olduğunu bildirdi. Bu, Azərbaycanın enerji siyasətində strateji diversifikasiya aparmaq niyyətini, həmçinin Avropa üçün alternativ və etibarlı enerji tərəfdaşı kimi rolunu gücləndirmək istiqamətində apardığı fəaliyyəti əks etdirir. Xüsusilə Xəzər dənizi vasitəsilə bərpa olunan enerji layihələrinin Macarıstan daxil olmaqla Avropaya çatdırılması, bu sahədə əməkdaşlığın gələcək inkişaf perspektivlərini göstərir.
Prezident İlham Əliyevin bəyanatında regional sabitlik və təhlükəsizlik məsələləri də mühüm yer tutdu. O, Ermənistanla sülh danışıqlarının davam etdiyini və Azərbaycanın bu prosesi səmimi şəkildə dəstəklədiyini bildirdi. Sülh sazişinə doğru atılan addımlar, Azərbaycanın regionda davamlı sülh və əməkdaşlıq üçün təşəbbüskar mövqe tutduğunu təsdiqləyir. Bu həm də Azərbaycan diplomatiyasının praqmatik və real nəticələrə yönəlmiş olduğunu göstərir.
Bu bəyanat ümumilikdə Azərbaycanın xarici siyasətində çoxşaxəli və prinsipial yanaşmanın bariz nümunəsi kimi dəyərləndirilə bilər. Azərbaycan Avropa ilə əlaqələrində həm iqtisadi, həm siyasi sahələrdə yeni əməkdaşlıq formatlarına açıq olduğunu, eyni zamanda regional sülhə və dayanıqlı inkişafa sadiq qaldığını bir daha nümayiş etdirdi. Macarıstanla bu səviyyədə qarşılıqlı anlaşma və strateji dialoqun qurulması isə Azərbaycanın Qərb ilə münasibətlərində mühüm siyasi kapital sayılır.
Azərbaycan Prezidenti İlham Əliyevin Macarıstanda səsləndirdiyi bəyanat, ölkənin xarici siyasət kursunun ardıcıl, dərinlikli və məqsədyönlü xarakter daşıdığını bir daha nümayiş etdirdi. Bu bəyanat sadəcə iki ölkə arasındakı münasibətlərin siyasi ritorikası deyil, həm də konkret strateji istiqamətlərin bəyan olunması idi. Budapeştdən səslənən fikirlər göstərdi ki, Azərbaycan Avropa ilə münasibətlərində real maraqlara əsaslanan, bərabərhüquqlu və dayanıqlı tərəfdaşlıq modelini təşviq edir.
Leyla Hüseynova
YAP Yasamal rayonu AMEA A.A.Bakıxanov adına Tarix və Etnologiya İnstitutu üzrə ərazi partiya təşkilatının sədr müavini
17:00 22.05.2025
Oxunuş sayı: 3967
