Agentlik rəsmisi: "BDU-nun Jurnalistika fakültəsində elmi tədqiqatların aparılması çox yüksək səviyyədədir"
"150 il keçir müqəddəs sözümüzün mətbu səviyyəyə çatmasından. Biz 150 illik işığında mətbuatımızın gələcəyindən danışmalıyıq. Bizi bundan sonra nə gözləyir? Məhz bu günkü konfransın ana mövzusu olan rəqəmsal mühitdə kommunikasiya əsas məsələdir".
Crossmedia.az xəbər verir ki, bunu Dövlət Universiteti (BDU) və Üsküdar Universitetinin birgə təşkilatçılığı ilə Azərbaycan Milli Mətbuatının 150 illiyinə həsr olunmuş Rəqəmsal dövrdə media və kommunikasiya fəaliyyəti mövzusunda beynəlxalq elmi konfransın açılışında Medianın İnkişafı Agentliyinin icraçı direktorunun müavini Natiq Məmmədli deyib:
"Rəqəmsal mühitdə Azərbaycan jurnalistikasının iki tərəfi var. Praktiki və elmi. Medianın İnkişaf Agentliyi bunun üçün inkişaf tədbirləri həyata keçirir.Biz dünən media subyektlərinin rəhbərlərinin iştirakı ilə kibertəhlükəsizliyə qarşı mübarizə şəraitində Azərbaycan mediası haqqında danışdıq. BDU-nun Jurnalistika fakültəsi elə bir təşəbbüslə çıxış edib ki, biz tam əminliklə deyə bilərik: fakültədə elmi tədqiqatların aparılması çox yüksək səviyyədədir".
O qeyd edib ki, bu konfrans təkcə bilik verməyəcək, eyni zamanda bilikləri bacarığa çevirəcək:
"Üzümü gənc jurnalistlərə tutaraq deyirəm: əgər mətbuatın tarixini 2,5 əsrlik dövr çərçivəsində götürsək, jurnalistikanın dəyişdiyinin şahidi olarıq. Amma jurnalistikanın prinsipi dəyişməyib. Jurnalistikanın əsas məqsədi həqiqətə xidmət etməkdir".
Fatimə Məmmədova
11:21 15.05.2025
Oxunuş sayı: 795
