AzTV sədri: "Azərbaycanda kiberhücumlar kəskin artıb"
"Hazırda Azərbaycanda rəqəmsal media özünün ən yüksək səviyyəsinə çatıb".
Crossmedia.az xəbər verir ki, bunu Dövlət Universiteti (BDU) və Üsküdar Universitetinin birgə təşkilatçılığı ilə Azərbaycan Milli Mətbuatının 150 illiyinə həsr olunmuş Rəqəmsal dövrdə media və kommunikasiya fəaliyyəti mövzusunda beynəlxalq elmi konfransda çıxışında Azərbaycan Televiziya və Radio Verilişləri Qapalı Səhmdar Cəmiyyətinin sədri Rövşən Məmmədov deyib.
Onun sözlərinə görə Azərbaycanda KİV-lərə kiberhücumlar artıb:
"Hazırda Azərbaycan rəqəmsal mediada inkişaf yolunu keçsə də manipulasiya hallarına da şahid oluruq. Bununla necə mübarizə aparmalı olduğumuzu bu beynəlxalq elmi konfransda müzakirə edəcəyik".
"Rəqəmsallaşma bu gün bütün dünyanın gözəlliyidir. Çünki rəqəmsallaşma müasir dövrün əsas tələbidir. Bu gün rəqəmsallaşmasız həyat qeyri-mümkündür.
Rəqəmsallaşma qloballaşma deməkdir. Bu səbəbdən media sahəsində inkişafın təmin olunması üçün media necə irəliləməlidir? Daha çox elm və peşəkar kadrların yetişməsi üçün nə etməliyik? Ənənəvi media bu şəraitdə necə davranmalıdır? Bu və digər istiqamətlər üzrə bu gün keçirilən konfrans öz sözünü deyəcək.
Rəqəmsallaşma informasiya cəmiyyəti deməkdir. Bu cəmiyyət bir neçə komponenti özündə cəmləşdirməlidir. Burada insanların internetə çıxışı təmin olunmalıdır. Rəqəmsal platformalar vacib şərtdir. Hazırda internetdən istifadə səviyyəsi 80-85 faizdir. Azərbaycanda faktiki olaraq rəqəmsal media özünün ən yüksək inkişaf səviyyəsindədir", -R.Məmmədov əlavə edib.
O qeyd edib ki, informasiya cəmiyyətində manipulyasiyalar da mövcuddur: "Biz Azərbaycan televiziyası olaraq “Medialab” platformasını yaratmışıq. Marağın artmasının kökündə, şübhəsiz, kibertəhlükələr dayanır. Biz bunlardan qorunmağı bacarmalıyıq. Bəs necə? Gəlin 44 günlük Vətən müharibəsi dövründə rəqəmsal platformalardan necə istifadə edildiyindən danışaq. Ən aktual və operativ məlumatlar cənab Prezidentin “Twitter” hesabında paylaşılırdı. Rəqəmsal dünya qaçılmaz prosesdir. Bu dünyaya qarşı qoyulan əsas iş onunla savaşmaq deyil, ona uyğunlaşmaqdır. Biz onun şərtlərinə uyğunlaşmalıyıq. Əks halda bu dünyaya inteqrasiya mümkün olmayacaq. Bu konfrans çərçivəsində çap olunan və ya olunacaq məqalələr rəqəmsal dünya ilə mübarizədə təmkinli əməkdaşlıq istiqamətində addım olacaq".
Fatimə Məmmədova
11:03 15.05.2025
Oxunuş sayı: 11859
