Üsküdür Universitetinin rektoru: "İki ölkə himnlərinin birgə səslənməsi çox əhəmiyyətlidir"
"İki ölkə himnlərinin birgə səslənməsi çox əhəmiyyətlidir".
Crossmedia.az xəbər verir ki, bunu Bakı Dövlət Universiteti (BDU) və Üsküdar Universitetinin birgə təşkilatçılığı ilə Azərbaycan Milli Mətbuatının 150 illiyinə həsr olunmuş Rəqəmsal dövrdə media və kommunikasiya fəaliyyəti mövzusunda beynəlxalq elmi konfransın açılışında Üsküdar Universitetinin rektoru Nazife Güngör deyib.
"İki ölkənin suverenlik tarixi, müstəqillik mübarizəsi çox oxşardır. Biz istəyirik ki, sevinclərimizi çoxaldaq", - o bildirib.
Rektor əlavə edib ki, mətbuatla müstəqillik mübarizə yol yoldaşıdır, bir - biri ilə əlaqəlidir: "Media güclü olsa, cəmiyyət, dövlət də güclü olar".
O, həmçinin BDU ilə əməkdaşlıqdan danışıb:
"Bir müddət əvvəl BDU ilə əməkdaşlığın prototipini yaratdıq. Bu əsasda yeni işlər görmək istəyirik. Zaman-zaman bir araya gələrək birlikdə nələr edə biləcəyimizi müzakirə etmək niyyətindəyik. Jurnalistika fakültəsi ilə əməkdaşlığa başlayıb, bunu digər fakültələrlə də davam etdirmək istəyirik. Bu gün hamımız birlikdəyik. Türkiyədən təxminən 100 nəfər araşdırmaçı, müxtəlif ölkələrdən akademiklər buradadır. Onlayn olaraq da təxminən 200-ə yaxın iştirakçı qoşulacaq. Biz çox xoşbəxtik, çünki tədbirimiz dünəndən başlayıb. Jurnalistika kafedrasında əsl festival ab-havası var. Bu isə BDU-da bizim üçün ilk təcrübədir. Bu ilk təcrübə bizi sevindirdi, çünki biz iki qardaş ölkəyik. Bu güclər yalnız iki ölkənin əməkdaşlığı deyil, həm də təhsil və akademik iş birliyidir. Çünki bizi yetişdirəcək olan informasiya istehsalı və təhsildir. Bu da bizi müasir dünyaya aparır.Biz universitet olaraq iki ali təhsil müəssisəsini bir araya gətirdik və əsas önəm verdiyimiz sahələr təhsil və akademiyadır. Bunu jurnalistika ilə başlatdıq".
N. Güngör əlavə edib ki, Ümummilli lider Heydər Əliyevin mətbuata verdiyi əhəmiyyəti Mustafa Kamal Atatürk də eyni şəkildə göstərmişdir.
Fatimə Məmmədova
10:51 15.05.2025
Oxunuş sayı: 1098
