Azərbaycan–Çin münasibətlərinə yeni baxış
Cari ilin 21 aprel tarixində Azərbaycan Prezidenti İlham Əliyev Çinin nüfuzlu Sinxua agentliyinə geniş müsahibə verib. Dövlət başçısı müsahibədə hər iki ölkənin münasibətlərinin tarixi inkişafı, hazırkı səviyyəsi və gələcək perspektivləri haqqında ətraflı fikirlərini bölüşüb.
Prezident İlham Əliyev bildirib ki, Azərbaycan ilə Çin arasında münasibətlər tarixi dostluğa və qarşılıqlı hörmətə əsaslanır. Bundan əlavə, Prezident 2023-cü ildə Astanada Çin Xalq Respublikasının Sədri Si Cinpin ilə imzalanmış “Strateji tərəfdaşlıq haqqında Birgə Bəyannamə”ni xatırladaraq, bu sənədin iki ölkə arasında münasibətlərin yeni mərhələyə keçdiyini təsdiqlədiyini vurğulayıb. Ölkə lideri İlham Əliyev qeyd edib ki, bu tərəfdaşlıq siyasi, iqtisadi və mədəni sahələrdə əməkdaşlığın dərinləşməsinə böyük töhfə verəcək.
Qeyd edək ki, müsahibədə Azərbaycanın Çin tərəfindən irəli sürülən “Bir Kəmər, Bir Yol” təşəbbüsünü ilk dəstəkləyən ölkələrdən biri olduğunu Prezident İlham Əliyev vurğulayıb. Azərbaycan bu təşəbbüs çərçivəsində mühüm logistika və nəqliyyat layihələrinə sərmayə yatırıb və təşəbbüsə ən çox sərmayə qoyan ikinci ölkə kimi tanınır. Bakı Beynəlxalq Dəniz Ticarət Limanı və Bakı-Tbilisi-Qars dəmir yolu bu kontekstdə xüsusi əhəmiyyət daşıyır.
Prezident Əliyev qeyd edib ki, Azərbaycan və Çin arasında əməkdaşlıq yalnız iqtisadi sahələrlə məhdudlaşmır. Mədəniyyət, təhsil və texnologiya sahələrində də tərəflər arasında əlaqələrin inkişafı üçün geniş imkanlar mövcuddur. Prezident, həmçinin, qarşılıqlı investisiya təşəbbüslərinin artırılması, birgə texnoloji layihələrin həyata keçirilməsi və tələbə mübadiləsi proqramlarının genişləndirilməsinin vacibliyini qeyd edib.
Prezident İlham Əliyevin Sinxua agentliyinə verdiyi müsahibə, Azərbaycan-Çin əlaqələrinin strateji mahiyyətini və ikitərəfli əməkdaşlığın yüksələn xətt üzrə inkişaf etdiyini bir daha göstərdi. Bu müsahibə iki ölkə arasında etimada əsaslanan, qarşılıqlı faydalı əməkdaşlığın daha da güclənəcəyindən xəbər verir.
Fərid Mustafayev
YAP Yasamal rayon Elm və Təhsil Nazirliyinin Torpaqşünaslıq və Aqrokimya İnstitutu üzrə ərazi partiya təşkilatının sədr müavini
12:20 23.04.2025
Oxunuş sayı: 5263
