“Ruhundakı qadının səsi ol” tədbirində qadınların daxili gücü və şəfa mövzusu ön planda oldu
Aprelin 5-də Qafqaz Biznes Mərkəzində baş tutan “Ruhundakı qadının səsi ol” adlı seminar qadınların psixoloji inkişafı və daxili güclərinin kəşfi mövzusuna həsr olunub. Tədbirin təşkilatçısı, psixoloq və “Qadınlar Cəmiyyətin İnkişafı Naminə” İctimai Birliyinin icraçı direktoru Nabat Mirzəyevanın təşəbbüsü ilə keçirilən seminarda Türkiyədən dəvət olunmuş ailə dizimi üzrə mütəxəssis, yazar Saba Deniz Uzun iştirak edib. Tədbirdə qadınların gündəlik həyatın təzyiqlərindən azad olaraq özlərinə daha yaxın durmaları, daxili sakitlik və şəfa tapmaları istiqamətində təcrübə və fikir mübadiləsi aparılıb.
Seminara dair təəssüratlarını və təşkilatçılıqla bağlı təcrübəsini bölüşən psixoloq Nabat Mirzəyeva tədbirin yaranma ideyası və gələcək planlardan danışıb. Aşağıda onunla keçirilən qısa müsahibəni təqdim edirik:
– Bu seminarı Azərbaycanda keçirmək ideyası necə yarandı? Saba Deniz Uzunu tədbirə dəvət etməkdə əsas məqsədiniz nə idi?
– Seminarı Azərbaycanda keçirmək fikri Asil Morayla əməkdaşlığımız nəticəsində formalaşdı. Daha öncə Asil bəy ilə bir sıra layihələrdə birgə çalışmışdıq və bu əməkdaşlıq vasitəsilə Türkiyənin tanınmış yazarı və ailə dizimi üzrə mütəxəssisi Saba Deniz Uzunla da tanış oldum. Onun qadınların psixoloji inkişafında göstərdiyi təsiri, səmimi yanaşması və ilhamverici fəaliyyətini yaxından izlədiyim üçün bu seminarda iştirakını çox istədim. Saba xanımın Azərbaycandakı qadınlara da şəfa verəcəyinə, onların daxili gücünü oyadacağına inandığım üçün onu bu tədbirə dəvət etdim.
– Tədbirdən öncə sizi ən çox həyəcanlandıran məqam nə idi? Gözləntiləriniz necə idi və reallıqla nə dərəcədə üst-üstə düşdü?
– Tədbirdən öncə ən çox düşündüyüm məqam bu idi: Görəsən, iştirakçılar tədbirdə özlərini rahat və dəyərli hiss edə biləcəklərmi? Onlara az da olsa daxili sakitlik, şəfa və dəyər hissi bəxş edə biləcəyikmi? Əsas məqsədimiz insanların gündəlik qayğı və problemlərdən bir az da olsa uzaqlaşıb, özlərinə daha yaxın durmaları, ayaqlarının üzərində daha inamla dayanaraq özlərini sevmələri idi. Açığını deyim, gözləntilərimi belə aşan bir seminar oldu. Orada iştirak edən hər bir insan mənim üçün çox dəyərlidir. Çünki onlar zamanlarını ayırıb gəldilər, bu da bizim üçün böyük məsuliyyət idi.
– Gələcəkdə bu mövzuda yeni seminarlar və layihələr planlaşdırırsınızmı?
– Bəli, mütləq! Gələcəkdə bu mövzuda davamlı seminarlar və layihələr təşkil etməyi planlaşdırıram. Mən “Qadınlar Cəmiyyətin İnkişafı Naminə” İctimai Birliyinin icraçı direktoru olaraq qadınların, ailələrin və fərdlərin inkişafına dəstək verəcək fəaliyyətlərə davam edəcəyəm. Yolumu bu istiqamətdə görürəm və bu yolda əlimdən gələni etməyə hazıram.
Gültac Mehdizadə
22:12 07.04.2025
Oxunuş sayı: 750
