Cəmiyyət çağdaş dövrə uyğun formalaşıbmı?
Bugünə qədər bir çox cəmiyyətlər yaranıb, zamanla dəyişərək yenilənib və modernləşməyə doğru addım atıb. Hazırda cəmiyyətlərin çağdaş dövrə uyğun formalaşması bir çox ölkə və xalqlarda sual altındadır. Çünki cəmiyyətin qlobal dünyaya uyğunlaşmasında dövlət, siyasi və iqtisadi təsirlər, düşüncə tərzləri mühüm rol oynayır.Cəmiyyətin müasir dövrə uyğunlaşması müxtəlif aspektlərdən irəli gəlir.
İlkin səbəb texnologiyanın dünyaya inteqrasiya edərək cəmiyyətin həyatında yer tutmasıdır. Mobil telefon və şəbəkələr, yeni nəsil texnoloji alətlər, süni intellekt, robot və digər yeniliklər cəmiyyətin müasirləşməsinə kömək edir və onları yeni dövrə uyğunlaşdırır. Lakin burada bir nüans var. Yeniliklər bəzi cəmiyyətlər üçün əlçatan deyil. Əsasən inkişaf etməkdə olan ölkələrin cəmiyyətlərinin çağdaş dövrə uyğun formalaşmasında bir çox suallar ortaya çıxır. Çünki texnoloji vasitələr və yeniliklər onların həyatlarına daxil olmağı bacara bilməyib. Bu da həmin cəmiyyətin digər inkişaf etmiş cəmiyyətlərdən geri qalmasına gətirib çıxarır.
Cəmiyyətin modern dünyaya uyğunlaşmasının göstəricilərindən biri də güclü təhsil sisteminin olmasıdır. Təhsil hər bir cəmiyyətin gələcəyini formalaşdırır. Təhsil sistemi güclü olan cəmiyyət müasir dünya ilə ayaqlaşır və yeniliklərlə yaxından tanış ola bilir. Bu imkanların olması cəmiyyətlərin qloballaşması və bir biri ilə sıx əlaqələrin qurulmasına kömək edir.
Dövlətlərin bir-biri ilə diplomatik əlaqələrinin olması cəmiyyətlərin bir-biri ilə qaynayıb-qarışmasına, münasibətlərin olmasına və cəmiyyətin modernləşməsinə kömək edir. İnkişaf etmiş ölkələr öz dəstəkləri ilə inkişaf etməkdə olan dövlətlərə köməklik edərək onların da yeniliklərə uyğunlaşmasına şərait yarada bilərlər.
Müasir dünyaya uyğunlaşan cəmiyyətlərdə bir çox məsələlər ortaya çıxır. Hətta bəziləri zamanla mübahisə mənbəyinə çevrilir. Gender bərabərliyi, etnik qruplar və dini azlıqların hüquqlarının qorunması dövrün gündəmdə olan müzakirələridir. Etnik qruplar da daxil olmaqla bütün cəmiyyət qloballaşan mədəniyyətə uyğunlaşmağa çalışır.
Bütün sadalanan amillər cəmiyyətin düşüncə və həyat tərzinə təsir edir. Çağdaş dünyaya addım atan cəmiyyət özü ilə bərabər yenilik və mübahisələr gətirə bilir. Müasirləşən ətraf mühitdə hər bir cəmiyyət demokratiyanı təmsil edir və öz statuslarını qorumağa çalışır. Ortaya çıxan problem və çətinliklər isə cəmiyyətlərin bir-birinə yardım və dəstəkləri nəticəsində aradan qalxa bilər.
Nurcan İsmayılova
16:18 07.04.2025
Oxunuş sayı: 936
