Azərbaycan-Almaniya əlaqələri dinamik inkişaf edir
Aprelin 2-də Azərbaycan Respublikasının Prezidenti İlham Əliyev və Almaniya Federativ Respublikasının Prezidenti Frank-Valter Ştaynmayer Bakıda keçirilən görüşdə iki ölkə arasında münasibətlərin möhkəmlənməsi istiqamətində mühüm məsələləri müzakirə etdilər. Cənab Prezident İlham Əliyevin də qeyd etdiyi kimi, bu səfər Azərbaycan-Almaniya münasibətlərinin tarixində yeni bir mərhələnin başlanğıcı hesab oluna bilər. Son illərdə Azərbaycan və Almaniya arasında siyasi dialoq intensivləşib. Prezident İlham Əliyevin vurğuladığı kimi, ötən il onun Berlində keçirdiyi görüşlər bu əlaqələrin inkişafında mühüm rol oynayıb. Bu il isə Almaniya Prezidentinin Azərbaycana ilk rəsmi səfəri baş tutdu. Bu səfər qarşılıqlı etimadın və strateji tərəfdaşlığın güclənməsi baxımından mühüm əhəmiyyət daşıyır. Görüş zamanı müzakirə olunan əsas məsələlərdən biri Cənubi Qafqazda sülh və sabitliyin təmin edilməsi idi. Cənab Prezident İlham Əliyev Azərbaycanın uzun illər Ermənistanın işğalından əziyyət çəkdiyini, beynəlxalq təşkilatların isə bu məsələdə ciddi addımlar atmadığını vurğuladı. Lakin Azərbaycan öz suverenliyini bərpa edərək regionda yeni reallıq yaradıb və hazırda Ermənistanla sülh danışıqları aparır. Həmçinin Azərbaycan-Almaniya əlaqələrinin inkişafı regional və beynəlxalq arenada yeni perspektivlər açmaqla yanaşı, iki ölkə arasında siyasi, iqtisadi və strateji əməkdaşlığın daha da güclənməsinə şərait yaradır. Bu baxımdan, Almaniya Prezidentinin Azərbaycana səfəri tarixi hadisə kimi qiymətləndirilə bilər.
Azərbaycan və Almaniya arasındakı iqtisadi əlaqələr dinamik inkişaf edir. Cənab Prezident İlham Əliyev bəyanatında ticarət dövriyyəsinin yalnız bu ilin ilk iki ayında üç dəfə artdığını vurğuladı. Bu artımın əsas səbəbi Azərbaycanın Almaniyaya ixrac etdiyi xam neftin həcminin artmasıdır. Lakin hər iki ölkə ticarət əlaqələrinin daha da şaxələndirilməsi üçün yeni imkanlar axtarır. Xüsusilə bərpaolunan enerji sahəsində əməkdaşlıq Azərbaycan və Almaniya arasında mühüm strateji istiqamət kimi nəzərdən keçirilir. Prezident İlham Əliyev Azərbaycanın 2030-cu ilə qədər xarici investorların iştirakı ilə bərpaolunan enerji istehsal gücünü 6 giqavata çatdırmaq niyyətində olduğunu bildirərək dedi: "Biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində – harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var," – deyə dövlət başçısı vurğuladı. Azərbaycanın ev sahibliyi etdiyi COP29 beynəlxalq iqlim konfransı çərçivəsində Almaniya ilə bu sahədə əməkdaşlığın genişləndirilməsi müzakirə olunub. Cənab Prezident İlham Əliyev qeyd etdi ki, bu tədbirə 197 ölkədən 77 mindən çox iştirakçı qatılıb və konfrans uğurlu nəticələrlə yadda qalıb. Görüş zamanı həmçinin beynəlxalq siyasi vəziyyət, Qərb və Rusiya arasındakı gərginlik, eləcə də Amerika-Avropa İttifaqı münasibətləri kimi məsələlər müzakirə edilib. Prezident İlham Əliyev bu məsələlərin qlobal siyasətə təsir etdiyini və Azərbaycan üçün strateji planlamada nəzərə alındığını qeyd etdi. Demək yerinə düşər ki, Azərbaycan-Almaniya münasibətləri təkcə enerji və iqtisadi əməkdaşlıqla məhdudlaşmır. Hər iki ölkə elmi-tədqiqat, innovasiya, texnologiya və təhsil sahələrində də sıx əməkdaşlıq edə bilər. Xüsusi vurğulamaq istəyirəm ki, Almaniya Prezidentinin bu səfəri Azərbaycanın beynəlxalq siyasətdəki mövqeyinin daha da möhkəmlənməsinə və Almaniya ilə əlaqələrin yeni mərhələyə keçməsinə xidmət edəcək. "Əminəm ki, bu səfərin çox müsbət nəticələri olacaqdır. İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir," – deyə Prezident İlham Əliyev yekun bəyanatında qeyd etdi. Cənab Prezident İlham Əliyev çıxışında qeyd etdi: "Azərbaycan və Almaniya arasında əlaqələr tarixən çox yüksək səviyyədə olub. Bu gün, hər iki ölkə arasında müxtəlif sahələrdə genişləndirilən əməkdaşlıq, həm iqtisadi, həm də mədəni sahələrdə yeni perspektivlər açır." Bu sözlər, Azərbaycan-Almaniya əlaqələrinin daha da möhkəmləndiriləcəyini və gələcəkdə qarşılıqlı faydalı layihələrin inkişaf etdiriləcəyini göstərir. Bu səfər, həm də siyasi və diplomatik əlaqələrin inkişaf etdirilməsi üçün bir fürsət yaratdı, iki ölkə arasında siyasi dialoqun davamlı olacağına, regiondakı mövcud problemlərin və qarşılıqlı maraq doğuran məsələlərin müzakirə ediləcəyinə inamı artırdı. Almaniya ilə əlaqələrin yeni dövrə qədəm qoyması, Azərbaycanın beynəlxalq münasibətlərindəki mühüm rolunu bir daha gücləndirdi.
Gülər Sultanzadə
YAP Yasamal rayon təşkilatının fəal üzvü
12:40 04.04.2025
Oxunuş sayı: 12979
