ABŞ-da Azərbaycanın minatəmizləmə fəaliyyətinə dair konfrans keçirilib
Azərbaycanın ABŞ-dakı səfirliyinin və Azərbaycan Respublikası Minatəmizləmə Agentliyinin (ANAMA) birgə təşkilatçılığı ilə ABŞ Konqresində “Azərbaycanda minatəmizləmə fəaliyyəti: prioritetlər və çağırışlar” adlı konfrans və fotosərgi təşkil olunub.
Crossmedia.az-ın məlumatına görə, tədbirdə Konqres üzvlərinin köməkçiləri, ANAMA-nın nümayəndə heyəti, Azərbaycan Respublikası Xarici İşlər Nazirliyinin nümayəndəsi, ABŞ-də fəaliyyət göstərən diplomatik missiyaların, beyin mərkəzlərinin təmsilçiləri, tələbələr və Azərbaycan icmasının üzvləri iştirak ediblər.
Konfransda açılış nitqi ilə çıxış edən Azərbaycanın ABŞ-dakı səfiri Xəzər İbrahim bildirib ki, Azərbaycan soyqırımına, etnik təmizləməyə məruz qalmış ölkədir və bütün bu minalar soyqırımı təcrübəsinin davamıdır. Yüz minlərlə azərbaycanlının öz evlərinə qayıtmaq hüququ var, lakin onların evləri tamamilə dağıdılıb və əraziyə minalar yerləşdirilib. 2 gün əvvəl daha bir azərbaycanlı mina partlaması nəticəsində xəsarət alıb.
ANAMA-nın İdarə Heyəti sədrinin müavini Samir Poladov bildirib ki, ərazilərin minalarla çirklənməsi Azərbaycanda təhlükəsizlik və inkişaf qarşısında duran ən ciddi maneələrdən biri olaraq qalır. Azərbaycanın ümumi ərazisinin təxminən 14 faizini təşkil edən 11 667 kvadrat kilometrə yaxın ərazi minaların və müharibənin partlayıcı qalıqlarının təsirinə məruz qalıb və bu, Azərbaycanı dünyanın ən çox minalanmış ölkələrindən birinə çevirir. Minalar insan tələfatına səbəb olur, bərpa və yenidənqurma səylərinə ciddi maneələr törədir.
“Azərbaycan hökuməti şəhər və kəndlərin yenidən qurulması, infrastrukturun bərpası və məcburi köçkünlərin təhlükəsiz şəkildə öz torpaqlarına qayıtması istiqamətində işlər aparır. Minalar təkcə müharibənin mirası deyil, onlar bərpa və uzunmüddətli sülh üçün maneədir. Böyük çağırışlara baxmayaraq, Azərbaycan bu böhranın həllinə sarsılmaz sadiqliyini nümayiş etdirib və humanitar minatəmizləməyə ən böyük milli töhfə verən ölkələrdən birinə çevirib”,- deyə Samir Poladov əlavə edib.
ANAMA rəsmisi bununla yanaşı bu istiqamətdə beynəlxalq tərəfdaşların, o cümlədən ABŞ-nın dəstəyini qeyd edib.
Marşal İrsi İnstitutunun inkişaf və kommunikasiya üzrə meneceri Eden Sleyter 2025-ci ildə iki qurum arasında əməkdaşlığın 20 ilinin tamam olduğunu bildirib. Onun sözlərinə görə, bu müddətdə institut ANAMA-ya 93 minaaxtaran it ianə edib və bu il bu rəqəmin 100-ə çatdırılması nəzərdə tutulub. O, ötən il Zəngilana getdiyini və ANAMA-nın gördüyü işləri və minalardan təmizlənmiş ərazilərə qayıdan insanları görmək şansının olduğunu deyib.
Daha sonra Azərbaycanın işğaldan azad olunmuş ərazilərində həyata keçirilən humanitar minatəmizləmə fəaliyyətinə dair videoçarx nümayiş olunub.
Sonda ANAMA nümayəndələri tərəfindən ölkəmizdə mövcud mina problemi və mina təhlükəsi ilə mübarizə istiqamətində həyata keçirilən fəaliyyətə dair təqdimat edilib. Təqdimatda 2020-ci ilin 10 noyabrından bu günədək 190 min hektardan artıq ərazinin minalardan və partlamamış hərbi sursatlardan təmizləndiyi və bu müddətdə 36 mindən çox piyada əleyhinə, 21 mindən artıq tank əleyhinə mina və 133 mindən artıq partlamamış hərbi sursatın aşkar edildiyi qeyd olunub.
Tədbirdə həmçinin, ölkəmizin üzləşdiyi mina problemi, onun yaratdığı fəsadlar və bu problemin arada qaldırılması istiqamətində görülən işləri əks etdirən fotosərgi təşkil olunub.
09:38 04.04.2025
Oxunuş sayı: 6451
