Moldovanın energetika naziri Azərbaycana gələcək
Moldovanın ergetika naziri Dorin Junqetu Azərbaycana səfər edəcək.
Crossmedia.az xəbər verir ki, bu haqda ölkənin Energetika Nazirliyi məlumat verir.
Bildirilib ki, nazir 4 aprel tarixində Bakıda keçiriləcək Cənub Qaz Dəhlizi Məşvərət Şurasının 11-ci Nazirlər Görüşündə və Yaşıl Enerji üzrə 3-cü Nazirlər Görüşündə iştirak edəcək.
“Bu tədbirlərdə Cənub Qaz Dəhlizinə üzv və tərəfdaş ölkələrin nazirləri və yüksək səviyyəli nümayəndələri, aparıcı enerji şirkətlərinin rəhbərləri, eləcə də, beynəlxalq maliyyə institutlarının nümayəndələri iştirak edəcəklər. Yüksək səviyyəli iclaslar zamanı sabit və etibarlı enerji təchizatının təmin edilməsi məsələləri və qlobal enerji sektorundakı əsas çağırışlar müzakirə olunacaq”, - nazirliyin məlumatında deyilir.
Qeyd olunur ki, Bakıda nazir Dorin Junqetu Avropa İttifaqının enerji və mənzil inşaatı üzrə komissarı Dan Yorqensen və Azərbaycanın energetika naziri Pərviz Şahbazovla danışıqlar aparacaq. Müzakirələrin mərkəzində regional enerji təhlükəsizliyi, səmərəli enerji əməkdaşlığı və bərpa olunan enerji sektorunun inkişafı məsələləri dayanacaq.
Qeyd edək ki, bu il aprelin 4-də Bakıda Cənub Qaz Dəhlizi Məşvərət Şurasının 11-ci iclası keçiriləcək.
Cənub Qaz Dəhlizi (CQD) Xəzər regionundan təbii qazı Avropaya nəql edir.
CQBK-yə üç əsas boru kəməri sistemi daxildir: Cənubi Qafqaz Boru Kəməri (CQBK), Trans-Anadolu Təbii Qaz Boru Kəməri (TANAP) və Trans-Adriatik Boru Kəməri (TAP). Dəhlizin ilkin ötürücülük qabiliyyəti ildə 10 milyard kubmetr olmaqla, 20 milyard kubmetrə qədər artırılması mümkündür.
14:15 03.04.2025
Oxunuş sayı: 8053
