Uğurlu insanların sirri - Psixoloq açıqlayır
Budəfəki müsahibimiz "Ahəng psixoloji inkişaf və dəstək" ictimai birliyinin sədri psixoloq Vüsalə Əmiraslanovadır. O, uğurun yalnız maliyyə bilikləri və sərmayə ilə deyil, düşüncə tərzi ilə də bağlı olduğunu vurğulayaraq həmçinin, milyonerlərin qərarvermə proseslərinin də bu yolda mühüm rol oynadığını bildirib.
- Sizcə, milyarderləri digərlərindən fərqləndirən əsas psixoloji amil hansıdır?
- Milyarderlər haqqında danışanda, onların bu vəziyyətə necə gəldiklərini də araşdırmalıyıq. Çox vaxt birdən-birə milyoner olmaq mümkün olmur. Bəzən mirasla, bəzən də aldığımız mirası düzgün xərcləyərək müflis oluruq. Əsas olan isə milyarder olmaq deyil, bu vəziyyəti qorumaqdır. Bu, düzgün qərar vermək, risklərə girmək və risk etməməyi bilmək, həmçinin psixoloji strategiyalar qurmaqla əlaqədardır. Bu faktorlar burada əsas rol oynayır.
Mən düşünürəm ki, az sərmayə ilə də çox uğur qazanmaq mümkündür. Bu təkcə maliyyə ilə bağlı bir məsələ deyil. Bəzən elə dostlarımız olur ki, heç bir maliyyə xərcləmədən də uğur əldə edə bilərik. Lakin milyarder olduqdan sonra onları fərqləndirən xüsusiyyətləri nəzərdən keçirmək vacibdir. Bəziləri pulun qiymətini dərk etməyərək onu itirir, bəziləri isə itirmək qorxusuyla yaşayır. Digər tərəfdən, bəziləri risklərə girərək daha çox qazana bilir, bəziləri isə həyatlarını rahatlaşdırmaq üçün düzgün strategiyalar qururlar.
- Uğurlu insanların düşüncə tərzini öyrənib tətbiq etməklə hər kəs eyni nəticələri əldə edə bilərmi? Yoxsa burada digər faktorlar da rol oynayır?
- Uğur haqqında danışarkən, hər bir insanın fərdi keyfiyyətlərini nəzərə almaq vacibdir. Uğur, əlbəttə ki, birdən-birə əldə olunmur. Hər zaman çalışqanlıq, öz üzərində işləmək, insanlarla düzgün ünsiyyət qurmaq, yeni tanışlıqlar qazanmaq və s. kimi yollarla əldə olunur. Lakin uğur hər kəsə görə fərqlidir. Kimisi ailə həyatında, kimisi maliyyə baxımından, bəziləri kariyera sahəsində, digərləri isə sadəcə sağlamlıq baxımından uğurlu olmaq istəyir.
Mən düşünürəm ki, hər kəs uğurlu ola bilər, amma hər kəs həmin uğuru saxlaya bilərmi, bu əsas məsələdir. Hər bir insanın fərdi xüsusiyyətləri, dünyaya baxış bucağı və digər amillər uğurun möhkəmlənməsində mühüm rol oynayır.
Zeynəb Yunuszadə
18:22 26.03.2025
Oxunuş sayı: 7597
