Rusiyanın Yaroslavl şəhərində Novruz Bayramı qeyd edildi
Rusiyanın Yaroslavl şəhərində Novruz Bayramına həsr olunmuş tədbir keçirilib. Tədbir Azərbaycan Respublikasının Dövlət Himninin səsləndirilməsi ilə açıq elan edilib.
Crossmedia.az xəbər verir ki, tədbirin təşkilatçısı, Azərbaycan Qadınlar Birliyinin rəhbəri Xatirə Qəmbərova çıxış edərək milli bayramların ölkə hüdudlarından kənarda keçirilməsinin vacibliyini vurğulayıb. O, belə tədbirlərin xaricdə böyüyən nəsillərə Azərbaycan adət-ənənələrinin, milli dəyərlərinin və ana dilinin gözəlliklərinin nümayiş etdirilməsində mühüm rol oynadığını qeyd edib.
Tədbirdə milli geyimlər, kəlağayılar, xalça nümunələri, milli ornamentlər, qədim qablar, musiqi alətləri, Novruz şirniyyatları, səməni və Novruz xonçaları nümayiş olunub. Yaroslavl Azərbaycan Qadınları bayram münasibətilə Məhəmmədhüseyn Şəhriyarın “Heydərbabaya salam” şeirini səsləndiriblər.
Bayram proqramında gənclər və uşaqlar milli mahnılar ifa edib, şeirlər söyləyib və rəqslər nümayiş etdiriblər. Novruz personajları – Bahar qızı, Keçəl və Kosa maraqlı çıxışları və oyunları ilə tədbirə xüsusi rəng qatıb. Həmçinin iştirakçılar arasında ən gözəl şəkərbura bəzəmə və Novruz xonçası müsabiqələri təşkil olunub, qaliblər hədiyyələrlə mükafatlandırılıb.
Tədbirin sonunda Yaroslavl Azərbaycan Qadınlar Birliyinin fəal üzvləri Yaroslavl Xalqlar Dostluğu Təşkilatının qramota və diplomları ilə təltif edilib. Xatirə Qəmbərovaya və onun təşkilat üzvlərinə Novruz Bayramı münasibətilə rəsmi təbrik təqdim olunub.
Bayram tədbirində Yaroslavl Azərbaycan Qadınlar Birliyinin Fəxri üzvü, Yaroslavl Dövlət Texniki Universitetinin “Əmək və ətraf mühitin mühafizəsi” kafedrasının müdiri, texniki elmlər doktoru, professor Sahibə Kalayeva da iştirak edib.
Tədbirin təşkilində sədr müavini Əfsanə Nəsibova, Aynur Qafarova, aparıcılar Fidan Şirinova, Esfrida Vəliyeva, fəallar Ülviyyə Eyubova, Ülviyyə Cəbiyeva, Esmira Səmədova, Nuranə Kərimova, Leyla Niftalıyeva, Kəmalə Şıxəliyeva, Əfsanə Allahverdiyeva və digərləri yaxından iştirak ediblər.
12:27 26.03.2025
Oxunuş sayı: 20473
