ASALA terrorçusu: "Üç keçmiş prezidentin ekstradisiya edilməsi ilə bağlı sorğu göndərilib"
ASALA terrorçusu: “Azərbaycan üç keçmiş prezidentin, eləcə də müharibədə döyüşənlərin ekstradisiya edilməsi ilə bağlı sorğu təqdim edib”
“Yaxşı haldır ki, Bakıda saxlanılan şəxslər məsələsi müxtəlif beynəlxalq təşkilatların diqqət mərkəzindədir, lakin Ermənistan hökuməti işə başlamayana qədər onların bütün bəyanatları və qətnamələri heç bir nəticə verə bilməz”.
Crossmedia.az xəbər verir ki, bunu Ermənistanın Mesrop Maştots Universitetinin Qafqaz Araşdırmaları Mərkəzinin rəhbəri Hovik Avanesov deyib.
Onun sözlərinə görə, müxtəlif beynəlxalq aktorların hansı prosesləri həyata keçirməsindən asılı olmayaraq, bu proseslər Ermənistan hakimiyyəti tərəfindən diplomatik platformada effektiv mexanizmlərə çevrilməsə, nəticə gözləmək mümkün deyil.
“Biz aydın şəkildə görürük ki, bu məsələ Ermənistan hakimiyyətinin gündəmində deyil və onlar bu haqda danışırlarsa da, bu, çox aşağı səviyyədədir”, - deyə Avanesov bildirib.
ASALA terror təşkilatının keçmiş üzvü, erməni terrorçu Vazgen Sislyan qeyd edib ki, o, Ermənistan hakimiyyətinin hərəkətsizliyindən deyil, erməni millətinin passivliyindən təəccüblənir.
Sislyan vurğulayıb ki, hakimiyyətin sözügedən məsələ ilə bağlı niyə addım atmadığını başa düşmək olar, amma erməni milləti passivdirsə, bu, artıq problemdir.
“Son nəticədə biz başa düşməliyik ki, bu gün Bakıda 23 nəfər yox, bütün erməni xalqı mühakimə olunur. Millət mümkün olanı etməlidir, millət ilk növbədə özünü, ləyaqətini xilas etmək üçün mübarizə aparmalıdır. Unutmayaq ki, Azərbaycan hakimiyyətə (Ermənistan hakimiyyətinə-red.) Ermənistanın üç keçmiş prezidentinin, eləcə də Qarabağ müharibəsində döyüşənlərin, yəni bütün erməni xalqının Azərbaycana ekstradisiya edilməsi ilə bağlı sorğu təqdim edib. Bütün bunlar Ermənistan hökuməti tərəfindən dəstəklənir, əgər bütün bu bəndləri təklif edən özləri olsalar, təəccüblənmərəm”, - deyə o əlavə edib.
14:42 26.03.2025
Oxunuş sayı: 6381
