Xankəndiyə həsr edilmiş broşür üç dildə nəşr edilib
İşğaldan azad edilmiş ərazilərə Böyük Qayıdış üzrə I Dövlət Proqramının Tədbirlər Planında nəzərdə tutulan məlumatlandırma, təbliğat-izahat və təşviqat işləri çərçivəsində, tanınmış tədqiqatçı-jurnalist Vasif Quliyevin müəllifliyi ilə Azərbaycan, ingilis və dillərində hazırlanmış “Xankəndi – Xanın kəndi” (“Khankendi – Khan’s village”, “Ханкенди – село хана”) broşürü nəfis tərtibatda nəşr olunub.
Crossmedia.az xəbər verir ki, broşürün ilk səhifəsində Prezident İlham Əliyev Xankəndi şəhəri ilə bağlı sözləri yer alıb: “Xankəndi qədim Azərbaycan diyarıdır. Bu kəndin təməli Qarabağ xanı tərəfindən qoyulmuşdur və ondan sonra Azərbaycan Respublikasının vəsaiti hesabına Azərbaycan memarları, inşaatçıları tərəfindən böyük şəhər yaradılmışdır”.
Broşürdə bu gün Qarabağın ən iri yaşayış məntəqəsi olan Xankəndi şəhərinin yaranması və ilkin inkişaf mərhələsi haqqında tarixi məlumatlar verilib. XVIII əsrin sonu – XX əsrin əvvəllərini əhatə edən məlumatlarda Qarabağ xanlığının qurucusu Pənahəli xanın oğlu İbrahimxəlil xan Cavanşirin, ilk növbədə, özünün at ilxılarını saxlamaq üçün Şuşa şəhərinə yaxın ərazidə – Qarqar çayının sahilində təbii-coğrafi cəhətdən əlverişli bir yer seçdiyi və 1780-ci ildən başlayaraq burada bütün daşınar əmlakını gətirib yerləşdirdiyi və xidmətçi ailələri məskunlaşdırdığı bildirilir.
Qeyd olunur ki, qısa müddətdə el arasında “Xanın kəndi” kimi məşhurlaşan həmin yaşayış məntəqəsi İran şahlarının Qarabağa hücumları zamanı dağıntıya məruz qalıb, sonralar isə Qarabağ xanlığını işğal edən çar Rusiyasının hərbi kontingentinin ixtiyarına keçib.
10:57 18.03.2025
Oxunuş sayı: 867
