XII Qlobal Bakı Forumu qlobal siyasətə aid vacib məsələlərin müzakirəsində aparıcı platformadır
Təsadüfi deyil ki, Prezident İlham Əliyev cənabları beynəlxalq tədbirlərə ev sahibliyi edən Azərbaycanın paytaxtında keçirilən XII Qlobal Bakı Forumunda çıxışında da dünya düzəninin yenidən düşünülməsi, çağırışların fürsətə çevrilməsi məsələsinə toxundu. Yeni dünya nizamının düşünülməsi isə bildiyimiz kimi davam etməkdə olan prosesdir. Bu gün dünyada çox ciddi siyasi hadisələr baş verir.Hətta dünənki müttəfiqlər bu gün özlərini düşmən kimi aparır və ya əksinə müttəfiq olmayanlar bu gün daha çox yaxınlaşırlar. Məhz bu reallıqların fonunda edilən çağırışlar artıq tarixi zərurətə çevrilib.
Belə bir vaxtda regionda qüdrətli söz sahibinə çevrilən Azərbaycana dünya dövlətlərinin etimadı və həsəd aparması təsadüfi deyil. Bütün bunlara səbəb 30 il ərzində BMT-nin həll edə bilmədiyi problemi ölkəmizin 44 günə öz gücü ilə sonlandırması idi. Bu gün isə artıq bütün dünyada öz sözünü deyə bilmiş balaca bir ölkənin paytaxtında qlobal problemlərə çarə axtarılır. XII Qlobal Bakı Forumundan dünyaya səslənməyimiz də Azərbaycanın bu məsələnin də həllinə öz töhfəsini verəcəyini bildirir. Qəbul etsələr də, etməsələr də, bu, bir dünya reallığıdır. Multilateralizmə və qlobal həmrəyliyə töhfə reallığı...
“Covid 19” dönəmində Azərbaycan reallığı və ya pandemiya ilə mübarizədə qazanılan liderlik…
Bu bir həqiqətdir ki, Azərbaycan dövləti "Covid 19" zamanında Beynəlxalq Birliyin III Dünya müharibəsi adlandırdığı bir təhdidlə üz-üzə qalarkən sözün həqiqi mənasında böyük dövlətlərin edə bilmədiyi addımı atdı. Əslində BMT Təhlükəsizlik Şurasının beş daimi üzvü bu halda qlobal liderliyi üzərinə götürməli, pandemiyaya qarşı mübarizədə beynəlxalq səyləri birləşdirməli idi, amma onlar bunu etmədilər. Bu reallıqda hər bir dövlət özünün kimliyini, məsuliyyətini ortaya qoydu və beləliklə sözügedən mübarizəyə hansı töhfəni verə biləcəyi potensialını üzə çıxartdı.
Qlobal bəlanın kölgəsinə sığınanlara qətiyyətli dərs…
Prezident İlham Əliyevin də qeyd etdiyi kimi, Azərbaycan elə də böyük dövlət olmasa da sözü mənalı və keçərli, çəkisi isə böyükdür. Bu isə ölkəmizin problemlərə qarşı atdığı qətiyyətli addımlarla şərtlənir. "Covid 19" pandemiyasına qarşı beynəlxalq mübarizənin səfərbər edilməsində əsl liderlik nümunəsi göstərən Azərbaycan Ümumdünya Səhiyyə Təşkilatının (ÜST) dünyaya qlobal çağırışlar etməsi fonunda həm də nümunə göstərdiyi ölkə idi. O ölkə ki, məlum koronavirus epidemiyası ilə mübarizə tədbirləri aparan dövlətlərlə müqayisədə ən az itki ilə çıxaraq iqtisadiyyatını qorumağı bacardı. Baxmayaraq ki, bu mübarizənin II Qarabağ müharibəsi ilə eyni zamana təsadüf etməsi Azərbaycan üçün ciddi risklər yaradırdı.
Qoşulmama hərəkatına sədrlik və qlobal səylərin səfərbər edilməsi…
Beynəlxalq ədaləti təmin etmək və beynəlxalq hüququn prinsiplərini müdafiə etmək məqsədilə təsis edilmiş Qoşulmama hərəkatına sədrliyi dönəmində Azərbaycan höküməti pandemiya elan olunan kimi COVID-19-a qarşı dünya güclərini birləşdirmək, qlobal səyləri səfərbər etmək təşəbbüsü ilə çağırış etdi. Azərbaycan Prezident İlham Əliyevin rəhbərliyi altında BMT baş məclisinin "Covid 19" pandemiyasına qarşı xüsüsi sessiya keçirilməsinə nail oldu. Bu sessiya çərçivəsində ümumbəşəri bəlaya qarşı mübarizədə beynəlxalq səylərin birləşdirilməsi ilə bağlı real addımlar atıldı. ÜST-ün Azərbaycanla hesablaşması 2020-ci ilin may ayında Qoşulmama Hərəkatının dövlət və hökumət başçıları səviyyəsində onlayn Zirvə toplantısının keçirilməsi təşəbbüsündən sonra özünü daha aydın biruzə verdi. Pandemiya ilə mübarizədə məlumat bazasının hazırlanması qərarından sonra Qoşulmama Hərəkatında İşçi Qrupu yaradıldı. Bu məlumat bazası isə Ümumdünya Səhiyyə Təşkilatının istinad mənbəsi oldu.Bütün bunların fonunda Azərbaycan dövləti 80-dən artıq ölkəyə humanitar və maliyyə yardımı göstərməklə ümumbəşəri mübarizənin ən üst pilləsində qərarlaşdı.
“Covid19”un qara “zirvəsi”: Peyvənd millətçiliyi ilə mübarizənin ədalətli göstəricisi…
Bəli, işimiz təkcə bununla kifayətlənmədi, çünki “Covid19”-un “siyahı”sında dövrün ən mürəkkəb problemlərindən biri olan vaksinlərin əldə edilməsi məsələsi var idi. Hegemon dövlətlərin “peyvənd millətçiliyi” isə koronovirus infekiyası ilə qlobal mübarizəyə əsl maneə idi. Bir sıra Avropa dövlətlərinin vətəndaşlarının peyvənd ehtiyaclarını ödəmək üçün üç, dörd dəfə çox vaksinlər əldə etməsi, kasıb ölkələrin bu vaksinlərə əlçatanlığının qarşısı almışdı.
Bəs, nə baş verdi?
Təbii ki, Prezident İlham Əliyevin təşəbbüsü ilə ölkəmiz bu məsələnin də ədalətli və vahid, sistemli və məqsədyönlü həllinə nail olmaq üçün 2021-ci ildə BMT-nin İnsan Hüquqları Şurasında və BMT Baş Assambleyasında könüllü olaraq qəbul edilən iki qətnamənin təşəbbüskarı oldu. Cenevrədə BMT-nin xüsusi toplantısında ölkə başçısı bu məsələləri bir daha qaldıraraq vaksinlərin bərabər, ədalətli bölgüsü ilə bağlı qərarın qəbul edilməsinə nail oldu. Beləliklə, əvvəldə də qeyd edildiyi kimi, Azərbaycanın atdığı böyük və qətiyyətli addımlar bu gün dünya üçün bir çox əhəmiyyətli situsiyaların həlledici məqamına çevrilib. Bu isə yalnız və yalnız uzaqgörən siyasət, ağıllı və çevik qərarlar hesabına baş verir.
Aytən Qurbanova
YAP Yasamal rayon "H.B.Zərdabi pr.61" (19 saylı Şəhər Poliklinikası) ünvanı üzrə ərazi partiya təşkilatının sədri, 19 saylı Şəhər Poliklinikasının baş həkimi
10:10 18.03.2025
Oxunuş sayı: 5676
