Qadın varsa…
Qadın-günəş, çocuq-ay...nuru ay günəşdən alır,
Qadınsız ölkə çapuq məhv olur, zavallı qalır.
H. Cavid
Qadınlar haqqında yazı yazarkən, qələmi göy qurşağının ən parlaq rənglərinə batırıb, hər bir hecasını kəpənək qanadlarının incə və zərif tozu ilə bəzəmək lazımdır… Bəlkə o zaman qadının zərifliyini və incəliyini anlata bildik….
Günəşin şöləsi olmadan, Ay necə nur ala bilmirsə, qadınsız da dünya qaranlığa məhkumdur… Qadın bir evin işığı, bir millətin mənəviyyatı, bir dünyanın nurudur. Qadın varsa, sevgi var, qadın varsa, mərhəmət var, qadın varsa, ümid var...
Qadın kimdir? Qadın həyatdır, qadın varsa, həyat var. Qadın təkcə həyat verən deyil, həm də həyata mənasını bəxş edəndir. Çünki qadın anadır, sevgidir, qayğıdır…
Deyirlər ki, əgər bir qadın sevdiyini, sevdiyi qədər möhkəm qucaqlaya bilsə, bütün sümükləri sınar. Belkə də düşünərsiz ki, zərif dediyimiz qadından necə dünyanın özü boyda sevgi ola bilər ki? Təəccüblənməyin. Axı bəşəriyyət onun bətnindən doğulub, sevgi də qadının qəlbindən daşaraq bütün dünyaya yayılıb. Bəzən deyirlər ki, qadın zəifdir, incədir, kövrəkdir. Lakin unudurlar ki, ən incə çiçək belə, qayaların arasında açır..
Ana laylası ilə böyüyən hər bir körpə, sevginin ən saf halını hiss edər. O sevgi ki, dağları titrədər, buzları əridər, qaranlığı aydınlığa çevirər. O sevgi ki, qadının ürəyində kök salar, sonra isə bütün dünyaya yayılır… O, səhərlər bir evin içini qızdıran isti çay qoxusudur, övladının saçlarını tumarlayan şəfqətli əllərdir…
Onun əlləri sanki bahar çiçəklərinin tumurcuqlanması kimidir – toxunduğu hər şeyə həyat verir. Heç təsadüfü deyil ki, peyğəmbərimiz cənnət anaların ayaqları altındadır deyib.
Qadın səsi bəzən bir nəğmə kimi sakitlik gətirir, bəzən bir külək kimi ruhları oyadır. O, göz yaşları ilə bir dünyanı kədərləndirə, təbəssümü ilə bir kainatı işıqlandıra bilər… O, külək olub həyatın tozunu silər, yağış olub hər kəsi təravətləndirər, günəş olub hər qəlbə işıq salar…
8 Martınız mübarək əziz qadınlar!
Nəzrin Salmanova
00:10 08.03.2025
Oxunuş sayı: 12563
