Amazon-nun məhsul siyasəti sahibkarların narazılığına səbəb olur
Amazon-nun yetkinlik məzmununa tətbiq etdiyi məhdudiyyətlər cinsi sağlamlıq sahəsində fəaliyyət göstərən bizneslər üçün çətinliklər yaradır. WIRED tərəfindən yayımlanan hesabatda bildirilir ki, bəzi məhsullar platformada “potensial olaraq utandırıcı” kimi qiymətləndirilərək bloklanıb.
VuVatech startapının təsisçisi Tara Langdale-Şmidt bildirib ki, onun şirkətinə məxsus cihazlar çanaq və vaginal ağrıları azaltmaq üçün nəzərdə tutulub. Lakin Amazon son illərdə dəfələrlə VuVatech-in məhsul siyahılarını ləğv edib. Onun sözlərinə görə, bəzən bu məhdudiyyətlər platformanın “böyüklər üçün məzmun” qaydalarına əsaslanıb. Ötən il isə Amazon VuVatech-in bir məhsuluna endirim kuponu əlavə edilməsinə mane olub. Şirkətin avtomatik sistemləri həmin məhsulu “potensial olaraq utandırıcı və ya təhqiramiz” kimi müəyyən edib.
Amazon-nun sözçüsü Cüliyana Karber WIRED-ə açıqlamasında bildirib ki, son bir ildə VuVatech məhsulları yetkinlik qaydalarını pozduğuna görə bloklanmayıb. O əlavə edib ki, Amazon cinsi sağlamlıq məhsullarının vacibliyini anlayır və bu sahədə minlərlə satıcı ilə əməkdaşlıq edir. Lakin müəyyən məhsullar “böyüklər üçün” kateqoriyasında olduğuna görə əlavə siyasətlərə tabe tutulur və yalnız bu cür məhsulları axtaran müştərilərə göstərilir.
Cinsi sağlamlıq sahəsində fəaliyyət göstərən şirkətlər illərdir ki, alış-veriş, reklam və sosial platformalarda tətbiq edilən məhdudiyyətlərdən narazılıq edirlər. WIRED və Center for Intimacy Justice təşkilatının ortaq araşdırması bu məhdudiyyətlərin geniş yayılmış problem olduğunu ortaya qoyur.
Zeynəb Yunuszadə
15:55 02.03.2025
Oxunuş sayı: 2576
