Meta məxfi məlumatları sızdıran təxminən 20 işçini işdən çıxarıb
TechCrunch və The Vergein məlumatına görə, Meta şirkəti məxfi məlumatları sızdırdıqlarına görə təxminən 20 əməkdaşını işdən çıxarıb.
Şirkətin açıqlamasında bildirilir ki, işə qəbul zamanı və mütəmadi olaraq işçilərə daxili məlumatları sızdırmağın şirkət qaydalarına zidd olduğu xatırladılır. Meta əlavə edib ki, bu məsələyə ciddi yanaşır və sızmalar müəyyən edildikdə müvafiq tədbirlər görəcək. Şirkət tərəfindən aparılan son araşdırma nəticəsində təxminən 20 işçinin daxili məlumatları xaricə ötürdüyü müəyyən edilib və onlar işdən kənarlaşdırılıb. Meta rəhbərliyi bu tip hadisələrin gələcəkdə də baş verə biləcəyini gözlədiklərini və bu cür halların qarşısını almaq üçün tədbirləri davam etdirəcəklərini bildirib.
Bu addım, Meta-nın daxili iclasları və açıqlanmayan məhsul planları ilə bağlı məxfi məlumatların mətbuata sızdırılmasından sonra atılıb. Xüsusilə Meta-nın baş icraçı direktoru Mark Zukerberqin rəhbərlik etdiyi sonuncu genişmiqyaslı iclasın detallarının yayılması şirkətin kəskin reaksiyasına səbəb olub. Sızmalardan sonra Meta əməkdaşlarını bu cür halların işdən çıxarılma ilə nəticələnəcəyi barədə xəbərdar edib.
Zeynəb Yunuszadə
16:53 01.03.2025
Oxunuş sayı: 1172
