Sənətdən cəbhəyə...
Sənət və Vətən sevgisi bir insanın şəxsiyyətini formalaşdıran sütundur. Hər bir insan müəyyən bir sənətə yiyələnir və bu sənət həm də Vətənə xidmətin gələcəyidir. Həm Vətən sevgisi, həm də peşəyə olan sevgi hər insana məxsus olmur. Buna görə də peşəyə yiyələnmək insanın gələcəyi üçün vacibdir. Mənə görə, sənət həm də insanın ruhunu formalaşdırır. Vətənə olan sevgi isə içdən hiss edilən, cəsarət və mübarizə tələb edən bir duyğudur. İncə qəlbə, ruha sahib olan mədəniyyət və incəsənət nümayəndəsi də Vətənə eyni hissləri bəsləyir. Bir sənətə yiyələndikdə bu sənətdə uğur qazanıb Vətənə töhfələr vermək isə hər kəs üçün asan olmur. Hansısa sənətdə bacarıqlı şəxsiyyət olmaq Vətənə təsir edir və onun gələcəyi üçün gərəkli addıma çevrilir.
Qədim dövrlərdən bəri Vətən sevgisi olan hər kəs torpaq uğrunda mübarizə aparıb. Bu mübarizədə mədəniyyət və incəsənət xadimləri öz şeirləri, yazdıqları əsərlərlə cəbhə bölgəsinə stimul verərək birlik yaradıblar. Yazılan şeirlər və mahnılar milli ruhun oyanmasında böyük rol oynayıb. Müharibə xatirələrinə həsr olunan müxtəlif əsərlərin yaddaşımıza həkk olunması və gələcək nəsillərə ötürülməsi Vətənə böyük dəstək olmuşdur. Bu sənət əsərləri cəbhə bölgəsinə mənəvi dəstək olmaqla yanaşı, bütöv bir xalqın mübarizə əzmini artırıb. Bir sözlə, bunlar sənətdən cəbhəyə olan sevginin göstəricisidir.Vətəni sevən əsl Vətən oğlu öz arzu və istəklərini yarımçıq qoyaraq cəbhəyə gedib, düşmənlə mübarizə aparıb, canından keçməyə belə razı olub. Çünki Vətən sevgisi onlar üçün əvəzolunmaz bir duyğudur.
Bu sevgiyə görə şəhidlik zirvəsinə ucalan qəhrəmanlarımızdan biri 23 yaşında arzularını, sevgisini, canını bu torpaq uğrunda fəda edən Azər Ələkbərovdur. O, rejissorluq arzusunu yarımçıq qoyaraq Vətən uğrunda mübarizə apararaq şəhidlik zirvəsinə ucalıb. Daha bir igidimiz sənətşünaslıq ixtisası üzrə təhsil alan və təhsilini dondurub könüllü hərbi xidmətə yollanan qazimiz Paşayev Faiqdir. Qadın qəhrəmanlarımızdan biri də Şəbnur Allahverdilidir. O, rejissorluq ixtisası üzrə təhsil almış və rejissor olaraq insanlara daha çox təsir edirdi. Məhz elə buna görə də cəbhədə əsgərlərə dəstək olmağa getmişdi. Çünki onlara mənəvi dəstək olmağa ehtiyac vardı. İgidlərimizə Azərbaycan xalqının həmişə onların yanında olduğunu demək, onlara dəstək olmaq böyük stimul verirdi.
Məhz elə öz sənətini cəbhəyə aparanlardan biri də Şəbnur Allahverdilidir.Sənətdən cəbhəyə olan sevginin digər simvolları da çox olub. Xurşidbanu Natəvan və Əhməd Cavadın milli birliyə çağıran əsərləri, müharibə dövründə “Cəbhəyə salam” kimi mahnılar, döyüşləri əks etdirən rəsm əsərləri xalqın qəhrəmanlıq ruhunu əbədiləşdirir və milli şüurun gücləndirilməsində mühüm rol oynayır. Xalqımızın bütün təbəqələrində olduğu kimi, sənətçilərimizin də Vətən sevgisi olub. Beləliklə, həm sənətə, həm də Vətənə olan sevgi eyni zamanda bir məsuliyyətdir. Hər bir gənc bu məsuliyyəti və sevgini içində yaşatmalıdır. Çünki bu sevgi fərdi bir yanaşma deyil, bir xalqın taleyidir. Sənətdən cəbhəyə gedən bu yol təkcə keçmişin qələbələrini deyil, gələcəyin də zəfərini işıqlandıran bir yol olacaqdır.Mən bütün bu fikirlərin reallığını görkəmli jurnalistimiz Şəhanə Müşviqin “Sənətdən Cəbhəyə” kitabını oxuyandan sonra bir daha xatırlamalı oldum. Şəhanə xanımın tərtib etdiyi bu ensiklopedik toplu Azərbaycan Dövlət Mədəniyyət və İncəsənət Universitetinin tələbə və məzunlarının torpaqlarımızın yağı düşmənin işğalından azad edilməsi uğrunda apardığımız müharibədəki qəhrəmanlıqlarına həsr olunub. Bu kitab müəyyən hissələrə bölünüb. Burada müharibə illərində igidlərimizin qəhrəmanlıqları əks olunub.İkinci Dünya müharibəsi dövründə Əşrəf Quliyev, Həsənağa Salayev, Qürbət Qurbanov, Cabir Səfərov kimi sənətkarlarımız düşmənlə mübarizə aparıb. Azərbaycan Dövlət İncəsənət Universitetinin tələbəsi olan, öz arzusunu, xəyallarını, canını bu torpaq uğrunda fəda edən Azər Ələkbərov 20 Yanvar faciəsinin qəhrəmanı olaraq kitabda qeyd olunmuşdur.
Daha sonra Birinci Qarabağ müharibəsi dövründə igidlik göstərən qəhrəmanlarımıza həsr olunmuş bölmədə Azərbaycan Dövlət Mədəniyyət və İncəsənət Universitetinin tələbəsi olmuş, sonralar müəllim kimi fəaliyyət göstərən və arzuları yarımçıq qalmış Dəryanur Salayev, Daşaltı əməliyyatı zamanı qəhrəmancasına həlak olan Təbriz Xəlil oğlu Xəlilbəyli və 1992-ci il iyulun 3-də Ağdərə şəhəri uğrunda qəhrəmancasına həlak olan Vaqif Əhmədov haqqında maraqlı publisistik fikirlər var.Digər bir bölmədə 44 Günlük Vətən müharibəsində qəhrəmanlıq göstərən, canından keçən igidlərimiz əks olunub. Vətən müharibəsindən sonra itirdiyimiz, arzusu şəhidlik olan qazimiz Ələkbər Axundova həsr olunmuş bölmədə onun qəhrəmanlığı hər kəsi qürurlandırır. Burada hər bölməni oxuduqca insan qürur hissi keçirir. Belə bölmələrdən biri də Vətən müharibəsində döyüşçü əməkdaşlarımızın xatirələrində necə qalmasıdır. Burada Azərbaycan Dövlət Mədəniyyət və İncəsənət Universitetinin qəhrəman igidlərinin müharibə dövründəki xatirələri əks olunur.Beləliklə, bu kitab gələcək nəsillər üçün bir örnəkdir. Burada adı keçən və yaxud keçməyən hər bir qəhrəmanımıza bugünkü həyatımıza görə borcluyuq. Çünki onlar öz xalqı üçün daim mübarizə aparıblar. Bu kitab, Vətən torpağını canı bahasına qoruyan, Azərbaycan Dövlət Mədəniyyət və İncəsənət Universitetinin tələbəsi olmuş şəhidlərimizə, Azərbaycanın şərəfli gələcəyi üçün fədakarlıq göstərən qazilərimizə həsr olunub. Onların qəhrəmanlığı xalqımızın azadlıq və birlik simvoludur.
Nurgün Qənizadə
13:12 26.02.2025
Oxunuş sayı: 3899
