“Azəriqaz”: Abonentlər soyuq havaya görə ciddi problemlə üzləşməyəcəklər
Azərbaycan Dövlət Neft Şirkətinin (SOCAR) “Azəriqaz” İstehsalat Birliyi ötən gündən etibarən ölkədə soyuq hava şəraiti və havanın kəskin sürətdə pisləşməsi ilə bağlı olaraq bütün növbədənkənar işçi heyətinin işə cəlb olunması prosesini həyata keçirib.
Bunu açıqlamasında “Azəriqaz”ın İctimaiyyətlə əlaqələr şöbəsinin müdir Eldəniz Vəliyev deyib
Onun sözlərinə görə, bu, onunla əlaqədardır ki, soyuq hava şəraitində abonentlər hər hansı bir problem yaşamasınlar: “May ayından etibarən hər il “Azəriqaz” İstehsalat Birliyi olaraq biz payız-qış mövsümünə hazırlıq prosesini icra edirik. Bu proseslər çərçivəsində yeraltı qaz xətlərinin yerüstü laylar üzərinə qaldırılması, korroziyaya uğramış qaz borularının yeniləri ilə əvəz olunması və sızmaların vaxtından aşkar olunması kimi tədbirlər həyata keçirilib. Bütün görülən işlər onu deməyə əsas verir ki, “Azəriqaz” olaraq biz abonentlərə söz vermişik ki, bu soyuq hava şəraitində heç bir ciddi problemlərlə üzləşməyəcəklər”.
O qeyd edib ki, hər hansı bir ərazidə müəyyən mənada qazın təzyiqinin aşağı düşməsi kimi lokal problemlərin olması mümkündür: “Bu zaman belə bizim əməkdaşlar dərhal baş vermiş hadisəyə reaksiya verir və bu cür lokal problemlərin aradan qaldırılması istiqamətində əllərindən gələni edirlər. Abonentləri əmin edə bilərəm ki, bu soyuq hava kütləsinin mövcud olduğu günlərdə onlar ciddi problemlər yaşamayacaq”.
E. Vəliyev həmçinin bildirib ki, 24 saat ərzində növbəlilik prinsipi ilə çalışan qurumun 104 qəza xidməti gücləndirilmiş iş rejimində fəaliyyət göstərir, gələn zənglərin vaxtında cavablandırılması və problemlərin aradan qaldırılması üçün işçi heyətinin sayı da artırılıb.(Report)
14:12 21.02.2025
Oxunuş sayı: 13304
