Apple süni intellekt komandasına mühüm dəyişiklik etdi
Apple süni intellekt (AI) komandasında diqqətçəkən mühüm dəyişiklik edib. Şirkətin AI sahəsinə yatırımlarını artıracağı gözlənilir.
Apple, süni intellekt sahəsində səylərini gücləndirmək və “Siri” virtual köməkçisini təkmilləşdirmək məqsədilə rəhbərlik qrupunda dəyişiklik etdiyini elan edib. Şirkətdə 36 illik təcrübəyə malik olan və “Vision Pro” proqram təminatının işə salınmasında mühüm rol oynayan Kim Vorrath artıq süni intellekt rəhbəri Con Ciannandrea’nın “baş köməkçisi” vəzifəsini icra edəcək.
Keçən il keçirilən WWDC konfransında süni intellekt təşəbbüslərinə dair böyük elanlara baxmayaraq, Apple üçün nəticələr hələ də “ChatGPT” kimi digər platformalarla müqayisə edilə bilmir. Şirkət yeni funksiyalarını tədricən həyata keçirir və ekran üzərindəki məlumatları başa düşərək ona uyğun hərəkət edə biləcək mühüm “Siri” yeniləməsi yalnız iOS 18.4 versiyası ilə birlikdə təqdim ediləcək.
Vorrath’ın təyin olunması qərarı, şirkətin süni intellekt texnologiyalarında daha ciddi inkişaf axtarışında olduğunu göstərir. Bu da “Vision Pro” cihazına mümkün diqqət dəyişməsinə işarə edir. Ciannandrea bir qeyddə süni intellekt qrupunun “Vision Pro”nun əsas infrastrukturunu yeniləməyə və təkmilləşdirməyə fokuslandığını bildirib.
Bu dəyişikliklər Apple-ın süni intellekti strateji prioritet kimi mövqeləndirmək niyyətini əks etdirir. Şirkət getdikcə daha rəqabətli hala gələn süni intellekt sahəsində mühüm yeniliklər etməyi hədəfləyir.
Nərgiz Camalzadə
19:07 25.01.2025
Oxunuş sayı: 4105
