"ChatGPT"-dən akademik məqsədlər üçün istifadə sürətlə artır
Süni intellekt dəstəyi ilə işləyən vasitələr, xüsusən də "ChatGPT"-nin istifadəsi, tələbələr arasında akademik tapşırıqlar üçün sürətlə yayılmaqdadır. Son zamanlarda aparılan sorğu amerikalı yeniyetmələrin araşdırma aparmaq, riyazi problemləri həll etmək və hətta inşa yazmaq kimi məktəb tapşırıqları üçün bu vasitəyə müraciət etdiyini ortaya qoyub.
"Pew Araşdırma Mərkəzi" tərəfindən keçirilmiş sorğuya görə, 13-17 yaş aralığındakı yeniyetmələrin 26%-i məktəb tapşırıqları üçün "ChatGPT"-dən istifadə etdiklərini bildirib. Bu da ötən ilə nisbətdə araşdırmaların iki dəfə artdığını göstərir. Bundan əlavə, sorğu göstərib ki, tələbələrin əhəmiyyətli bir hissəsi "ChatGPT"-dən müxtəlif akademik işlərdə istifadəni qəbul edilə bilən hesab edir.
Süni intellekt köməkçiləri təhsil prosesinə yardım edə bilsə də, son araşdırmalar onların xüsusilə təhsil işlərində dəqiqliyinin məhdud olduğunu göstərib. "GPT-4" modeli doktorantura səviyyəsində tarix imtahanında test edildikdə, modelin “yalnız təsadüfi cavablardan bir qədər daha yaxşı” nəticə verdiyi bildirilib.
Eyni zamanda, "GPT-4"-ün çoxmərhələli vurma əməliyyatlarında çətinlik çəkdiyi və ya aşağı dəqiqlik nümayiş etdirdiyi müşahidə edilib. Süni intellekt vasitələrinin istifadəsi isə öyrənmə nəticələrinə mənfi təsir göstərir.
Araşdırmalar "ChatGPT"-dən istifadə edən türk lisey şagirdlərinin riyaziyyat testlərində ən zəif nəticələr göstərdiyini ortaya çıxarıb. Başqa bir araşdırma isə "ChatGPT"-nin araşdırma materiallarını tapmağı asanlaşdırdığı halda, məzmunu ümumiləşdirməkdə tələbələrin performansını azaltdığını göstərib.
Bu vəziyyət təhsil işçiləri arasında süni intellekt vasitələrinin dərslərdə istifadəsinə şübhə ilə yanaşılmasına səbəb olub. Müəllimlərin əhəmiyyətli bir hissəsi süni intellekt vasitələrinin tələbələrə kömək etməkdən çox, onlara zərər verdiyinə inanır.
Emil Nağızadə
18:51 18.01.2025
Oxunuş sayı: 2258
