Samsung telefonlara yeni süni intellekt xüsusiyyətləri gəlir!
“Galaxy S25” seriyasının təqdimat afişalarına görə, Cənubi Koreya mənşəli şirkət yeni süni intellekt xüsusiyyətləri üzərində işləyir.
“Samsung”-un “Galaxy S25” seriyası ilə bağlı sızıntılar sürətlə davam edir. Cihazların dizaynından kameralarına, hətta örtüklərinə qədər bir çox detal dəqiqləşmişkən, indi də süni intellekt (AI) dəstəkli yeni xüsusiyyətlər ortaya çıxıb. “Tecnoblog” tərəfindən yayımlanan rəsmi təqdimat materialları, “Galaxy S25” seriyasının istifadəçi təcrübəsini tamamilə dəyişdirə biləcək yeni süni intellekt imkanlarını göstərir.
Sızıntılara əsasən, “Samsung” “Google”-un yeni nəsil süni intellekt modeli “Gemini”-ni “Galaxy S25” seriyasına inteqrasiya edir. İstifadəçilər telefonlarına “Hey Gemini” əmri ilə müraciət edərək, süni intellekt dəstəyi ilə birbaşa əməliyyatlar həyata keçirə biləcəklər. Bu inteqrasiya “Samsung” cihazlarının süni intellekt əsaslı tətbiqlər arasında problemsiz şəkildə işləməsinə imkan yaradacaq.
“YouTube”-da izlənilən bir videodan xülasə çıxararaq onu birbaşa “Samsung Notes” tətbiqinə qeyd etmək sadəcə səsli əmrlə mümkün olacaq. Bu xüsusiyyət məzmun istehlakını daha səmərəli hala gətirəcək və süni intellektin gündəlik həyatın hər sahəsində daha fəal rol oynamasını təmin edəcək.
“Samsung”-un “Galaxy S25” seriyası ilə təqdim edəcəyi ən diqqətçəkən yeniliklərdən biri də “Now Brief” adlanan süni intellekt xüsusiyyətidir. “Google Now”-un müasir versiyası kimi görünən bu xüsusiyyət istifadəçilərə xüsusi məlumatlar təqdim edərək, fərdi köməkçi funksiyasını yerinə yetirəcək.
Bu yenilik “Samsung”-un süni intellekt dəstəkli ağıllı köməkçi xüsusiyyətlərini daha da inkişaf etdirmək səylərinin bir hissəsi kimi qiymətləndirilir. Fərdiləşdirilmiş istifadəçi təcrübəsi təqdim edərək, AI-ın cihazlarla qarşılıqlı əlaqəsini artırması gözlənilir.
“Samsung”-un “Galaxy AI” vizionu ilə uyğun olan bu xüsusiyyətlər, “Google”-un ekosisteminə daha sıx inteqrasiya olunma səylərinin bir əksidir. Süni intellektin getdikcə daha çox tətbiqlərarası vəzifələri yerinə yetirə bilməsi, istifadəçilərin telefonlarını daha səmərəli və ağıllı şəkildə istifadə etmələrinə kömək edəcək.
Nərgiz Camalzadə
15:53 16.01.2025
Oxunuş sayı: 2456
