Texnologiya

Bir dövrün sonu: Nokia ağıllı telefon bazarından rəsmən çəkildi!

2017-ci ildə HMD Global, Nokia markası altında telefon istehsal etmək hüququnu aldıqda, bir çox insan bunun şirkətin keçmişdəki şanlı günlərinə qayıtması üçün yetərli olub-olmadığını sorğulamışdı. Lakin aradan keçən yeddi ildən sonra HMD-nin bütün səylərinə baxmayaraq, Nokia, Apple və Samsung kimi nəhənglərlə rəqabət apara bilmədi. Son bir neçə ildir Nokia telefonlarından böyük bir yenilik və ya diqqətçəkən bir elan gəlməməsi, bəlkə də acı sonun müjdəçisi idi.

Nokia-nın macərasına son nöqtəni isə HMD-nin bir neçə gün əvvəl Nokia-nın bütün ağıllı telefon və planşetlərini rəsmi veb-saytından çıxarması qoydu. Bu addım, Nokia markalı ağıllı cihazların rəsmən sonu oldu. Şirkətin möhkəmliyi ilə seçilən son modeli olan Nokia XR21 belə, bu dəyişiklikdən təsirləndi. Artıq Nokia-nın ağıllı telefonlarını görmək mümkün deyil, lakin şirkətin düyməli telefonları satışda qalmağa davam edəcək.

Nokia-nın ağıllı telefonlardan imtina etməsi, texnologiya nəhənginin tamamilə təslim olduğu anlamına gəlmir. Şirkət hazırda kosmosda hüceyrə şəbəkəsi qurulması kimi yenilikçi layihələr üzərində çalışır və texnologiya sektorunun bir çox sahəsində fəaliyyətini davam etdirir. Ağıllı telefon bazarında mövqeyini qoruya bilməyən markalar arasına düşsə də, bu vəziyyətin LG nümunəsində olduğu kimi Nokia üçün yeni fürsətlərin qapısını açması mümkündür.

Nokia sadəcə telefon istehsalçısı deyildi, həm də bir nəslin texnologiya ilə olan əlaqəsini formalaşdıran bir marka idi. Günümüzdə Apple, Samsung və Google kimi nəhənglər sektoru idarə etsə də, Nokia-nın keçmişdəki təsiri unudulmayacaq. Bir dövrün vazkeçilməzi olan modelləri ilə, xatirələrimizdəki yerini həmişə qoruyacaq.

Nərgiz Camalzadə