İlon Maskdan süni intellekt üçün təəccübləndirici açıqlama: Tükənmə prosesi başladı
İlon Mask süni intellekt sahəsində diqqət çəkən bir açıqlama verdi. Onun sözlərinə görə, modelləri öyrətmək üçün istifadə edilən məlumat mənbələrinin tükənmə prosesi artıq başlayıb.
Son illərdə süni intellekt sahəsində böyük bir inkişaf müşahidə olunur. Xüsusilə söhbət botlarının həyatımıza daxil olması ilə bu texnologiyanın necə təsiredici səviyyəyə çatdığı aydın oldu. “Microsoft” , “Apple”, sosial media nəhəngi “X” və “Google” kimi bir çox şirkət bu sahədə rəqabətə qoşulub. Bu gün isə məşhur iş adamı İlon Mask, süni intellekt dünyasında səs gətirən bir açıqlama verdi.
Məlum olduğu kimi, süni intellekt modellərini öyrətmək üçün geniş və müxtəlif məlumat dəstlərindən istifadə olunur. Bu məlumatlar modelin öyrənməsini təmin etmək və müxtəlif ssenarilərdə dəqiq proqnozlar verməsinə imkan yaratmaq üçün mühüm rol oynayır. Məlumat dəstləri, əsasən mətn, şəkil, səs və ya digər formalarda ola bilər və modelin müəyyən sahələrdə daha dəqiq və təsirli nəticələr verməsini təmin edir.
İlon Mask, süni intellekt modellərini öyrətmək üçün istifadə olunan məlumat mənbələrinin artıq tükəndiyini açıqlayıb. Mask bu tükənmə prosesinin əslində 2023-cü ildən başladığını bildirib.
İş adamı, yeni süni intellekt modellərini öyrətmək üçün məlumat çatışmazlığı probleminin yeganə həll yolunun sintetik məlumatlardan istifadə olduğunu qeyd edib. Sintetik məlumat, süni intellekt tərəfindən yaradılan və real məlumatların yerini doldura bilən süni məlumat dəstləri kimi istifadə olunur. “Meta” , “Microsoft” , “OpenAI” və “Google” kimi texnologiya nəhəngləri də bu üsuldan istifadə edirlər.
Nərgiz Camalzadə
12:59 11.01.2025
Oxunuş sayı: 3757
