Alimlər kaktuslardan elektrik enerjisi əldə etməyin yolunu tapıblar
Amerikalı alimlər kaktuslardan elektrik enerjisi əldə etməyə imkan verən yeni üsul hazırlayıblar. Tədqiqatçılar müəyyən ediblər ki, bəzi kaktus növlərinin gövdələri kiçik həcmdə elektrik enerjisi istehsal edə bilir.
Crossmedia.az xəbər verir ki, bu barədə “Plants, People, Planet” elmi jurnalı məlumat yayıb.
Kaliforniya Universitetinin Santa-Kruz kampusunun alimləri tikanlı armud (opuntiya) kaktusunun xüsusi fotosintez mexanizmindən istifadə edərək onu enerji mənbəyinə çevirməyi bacarıblar.
Araşdırmada CAM adlanan fotosintez növünün xüsusiyyətləri əsas götürülüb. Bu mexanizmə malik bitkilər, o cümlədən kaktus, aloe, ananas və pitahayya karbon qazını əsasən gecə saatlarında mənimsəyərək suya qənaət edirlər.
Günəş işığı kaktusun gövdəsinə düşdükdə onun işıqlanan və kölgədə qalan hissələri arasında turşuluq fərqi yaranır. Məhz bu fərq elektrik gərginliyinin formalaşmasına imkan verir.
Tədqiqatçılar müəyyən ediblər ki, bir kaktus gövdəsi 0,5 volta qədər elektrik gərginliyi yarada bilir. Səkkiz gövdəni birləşdirən alimlər isə 4,5 volt enerji əldə ediblər. Bu göstərici təxminən üç ədəd AA batareyasının yaratdığı gərginliyə bərabərdir.
Alimlər yeni texnologiyanın gələcəkdə kənd təsərrüfatında istifadə oluna biləcəyini düşünürlər. Belə ki, kaktuslardan əldə edilən enerji torpağın və bitkilərin vəziyyətini izləyən aşağı enerji sərfiyyatlı sensorların işlədilməsinə imkan verə bilər.
Tədqiqatçılar həmçinin bildirirlər ki, yaranan elektrik gərginliyinin səviyyəsi bitkinin fotosintez fəaliyyəti və ümumi vəziyyəti haqqında məlumat əldə etməyə kömək edə bilər.
03:10 20.11.2026
Oxunuş sayı: 33