Şahzadə Harri sosial şəbəkələri sərt tənqid etdi: Uşaqların beyni yuyulur
Böyük Britaniya şahzadəsi Harri sosial şəbəkələrin uşaqların psixi sağlamlığına mənfi təsirini tənqid edərək texnologiya şirkətlərinə qarşı daha sərt tənzimləmələrin tətbiqinə çağırıb.
Crossmedia.az xəbər verir ki, "Euronews" bu barədə məlumat yayıb.
Noyabrın 10-da Belçikanın paytaxtı Brüsseldə Avropa Parlamentində çıxış edən Sasseks hersoqu sosial şəbəkələrdə yayılan qısa videoların və alqoritmlərin uşaqlar üzərində güclü təsirə malik olduğunu bildirib.
Harri bu təsiri misli görünməmiş miqyasda beyin yuyulması kimi qiymətləndirib. O, çıxışı zamanı telefonlarından istifadə edən auditoriya üzvlərinə də diqqət çəkərək rəqəmsal platformaların gənclərə vurduğu zərər barədə düşünməyə çağırıb.
Şahzadə uşaqların internetdə təhqir, zorakılıq və psixoloji təzyiqlərdən qorunmasının vacibliyini vurğulayıb.
O, Avropa İttifaqında müzakirə olunan “EU Kids Act” qanun layihəsini dəstəkləyərək uşaqların internet təhlükəsizliyinə görə məsuliyyətin yalnız valideynlərin üzərinə qoyulmamalı olduğunu bildirib.
Qanun layihəsində sosial şəbəkələrdə yaşın yoxlanılması, asılılıq yaradan funksiyaların məhdudlaşdırılması və texnologiya platformalarının məsuliyyətinin artırılması kimi tədbirlər nəzərdə tutulur.
Harri həyat yoldaşı Meqan Marklla birlikdə Avropa Parlamentində onlayn təhlükələr nəticəsində övladlarını itirmiş ailələrə həsr olunan xatirə tədbirində də iştirak edib.
Meqan Markl tədbirə qatılsa da, əvvəlcədən planlaşdırılan çıxışını etməyib.
Avropa rəsmiləri uşaqların rəqəmsal mühitdə daha effektiv qorunmasına yönələn qanunvericilik təşəbbüslərinin əhəmiyyətini vurğulayıblar.
00:30 20.11.2026
Oxunuş sayı: 35