Kalininqraddan Pskova uçan təyyarədə insident – qadın stüardessaya hücum edib
Rusiyada Kalininqraddan Pskova uçan sərnişin təyyarəsində insident baş verib. 35 yaşlı qadın sərnişin uçuş zamanı aqressiv davranış nümayiş etdirərək stüardessaya hücum edib. Təyyarə Pskov hava limanına endikdən sonra qadın polis əməkdaşları tərəfindən saxlanılıb.
Crossmedia.az xəbər verir ki, bu barədə “Gazeta.ru” məlumat yayıb.
Rusiya Daxili İşlər Nazirliyinin Şimal-Qərb Federal Dairəsi üzrə Nəqliyyat İdarəsinin məlumatına görə, qadın uçuş müddətində özünü aqressiv aparıb, nalayiq ifadələr işlədib və əllərini yelləyərək ətrafdakıları narahat edib.
Aviaşirkət əməkdaşlarının və digər sərnişinlərin xəbərdarlıqlarına baxmayaraq, o, davranışını dəyişməyib.
İnsidentin ən gərgin anı isə qadının stüardessanın boğazından yapışması olub. Hadisədən sonra zərərçəkmişin həmkarları Pskov hava limanında polis əməkdaşlarının təyyarəyə göndərilməsini istəyiblər.
Təyyarə eniş etdikdən sonra polis əməkdaşları qadını saxlayaraq araşdırma aparılması üçün növbətçi hissəyə aparıblar. Onun barəsində Rusiya İnzibati Xətalar Məcəlləsinin xırda xuliqanlıqla bağlı 20.1-ci maddəsinin birinci hissəsi üzrə protokol tərtib edilib.
Qeyd edək ki, bu, Rusiyada təyyarə göyərtəsində baş verən ilk insident deyil. Bundan əvvəl Volqoqrad hava limanında sərxoş kişi 150 sərnişinin olduğu təyyarəni ələ keçirməklə hədələmişdi. Hadisədən sonra 42 yaşlı kişi polis tərəfindən saxlanılmış, təyyarə və baqaj kinoloqlar tərəfindən yoxlanılmışdı. Yoxlama zamanı partlayıcı maddə aşkarlanmasa da, reysin iki saat gecikdiyi bildirilmişdi.
23:56 19.11.2026
Oxunuş sayı: 54