Güclü maqnit qasırğasından sonra Yer ətrafında ilk dəfə dörd radiasiya qurşağı qeydə alınıb
Güclü maqnit qasırğasından sonra Yer ətrafında ilk dəfə eyni vaxtda dörd energetik elektron qurşağı müşahidə edilib.
Crossmedia.az xəbər verir ki, bu barədə “npj Space Exploration” jurnalında dərc olunan elmi araşdırma məlumat yayıb.
Tədqiqatçılar müəyyən ediblər ki, 2024-cü ilin mayında baş verən güclü maqnit qasırğasından sonra Yer ətrafındakı radiasiya mühitində qeyri-adi dəyişikliklər baş verib. Adətən iki elektron qurşağı müşahidə olunduğu halda, qasırğadan sonrakı ilk günlərdə üç, iyun ayında isə dörd qurşaq qeydə alınıb.
Araşdırma Belçika Kral Kosmik Aeronomiya İnstitutunun alimləri tərəfindən aparılıb. Tədqiqat zamanı PROBA-V peykinin EPT cihazından əldə edilən məlumatlardan istifadə olunub.
Alimlərin hesablamalarına görə, bu hadisənin mümkün səbəblərindən biri elektronları səpələyərək onların bir hissəsini atmosferə yönəldən elektromaqnit dalğalarıdır.
Müşahidələr göstərib ki, güclü maqnit qasırğaları Yerətrafı radiasiya mühitinin strukturunu həftələrlə dəyişə bilər. Bu dəyişikliklər xüsusilə peyklərin təhlükəsiz fəaliyyəti baxımından əhəmiyyətlidir.
Qeyd edək ki, avqust ayına qədər Yer ətrafında əvvəlki iki qurşaqlı struktur yenidən bərpa olunub.
02:04 20.11.2026
Oxunuş sayı: 60