Akademik İsa Həbibbəyli Gürcü Ədəbiyyatı İnstitutunun nümayəndə heyəti ilə görüşüb
AMEA-nın prezidenti akademik İsa Həbibbəyli Şota Rustaveli adına Gürcü Ədəbiyyatı İnstitutunun direktoru filologiya elmləri doktoru, professor İrma Ratianinin rəhbərlik etdiyi nümayəndə heyəti ilə görüşüb.
Crossmedia.az xəbər verir ki, AMEA-nın Rəyasət Heyətində keçirilən görüşdə AMEA-nın Nizami Gəncəvi adına Ədəbiyyat İnstitutu və Memarlıq və İncəsənət İnstitutu ilə Şota Rustaveli adına Gürcü Ədəbiyyatı İnstitutunun birgə icra etdiyi “Nizami Gəncəvi və Şota Rustaveli ədəbiyyatda və incəsənətdə” beynəlxalq elmi layihənin gedişi, əldə olunan nəticələr və qarşıda duran vəzifələr barədə müzakirələr aparılıb.
Akademik İsa Həbibbəyli bu layihənin Azərbaycan və Gürcüstan alimlərinin birlikdə həyata keçirdikləri ikinci layihə olduğunu, ilk layihə çərçivəsində işıq üzü görən “Nizami Gəncəvi və Şota Rustaveli” monoqrafiyasının Bakıda, Tbilisidə və Kembricdə Azərbaycan, gürcü və ingilis dillərində kitab halında nəşr olunduğunu xatırladıb. Qeyd edib ki, əldə olunan nəticələr iki ölkənin elmi və ədəbi əlaqələrinin, eləcə də görkəmli ədiblərin milli kimliklərinin beynəlxalq miqyasda tanıdılmasına xidmət edir.
Akademik İsa Həbibbəyli ötən müddət ərzində “Nizami Gəncəvi və Şota Rustaveli ədəbiyyatda və incəsənətdə” layihəsi çərçivəsində görülən işləri yüksək qiymətləndirərək, növbəti nəşrin hazırlanması məsələsinə toxunub. Akademik İsa Həbibbəyli AMEA-nın Nizami Gəncəvi adına Ədəbiyyat İnstitutu və AMEA-nın Memarlıq və İncəsənət İnstitutunun əməkdaşları tərəfindən layihənin növbəti nəşri üçün Nizami Gəncəvinin əsərlərinin süjet və obrazlarının musiqidə, teatrda, kinoda, təsviri sənətdə, memarlıqda və tətbiqi incəsənətdə əksini əhatə edən məqalələr hazırlandığını söyləyib və mövzuları qonaqların diqqətinə çatdırıb.
Şota Rustaveli adına Gürcü Ədəbiyyatı İnstitutunun direktoru filologiya elmləri doktoru, professor İrma Ratiani nəşrin strukturunun Azərbaycan və gürcü ədəbiyyatı, eləcə də incəsənət nümunələrinin paralel şəkildə təqdim olunmasını təklif edib. Onun sözlərinə görə, nəşrdə əvvəlcə hər iki xalqın ədəbiyyatı, daha sonra isə incəsənəti ilə bağlı tədqiqatların yer alması nəzərdə tutulur. Bu yanaşma Azərbaycan və Gürcüstan ədəbi-bədii irsinin müqayisəli şəkildə öyrənilməsinə və oxuculara təqdim olunmasına imkan yaradacaq.
Professor İrma Ratiani layihənin növbəti mərhələsində Nizami və Rustavelinin dünya ədəbiyyatında qavranılmasını, onların Şərq və Avropa ədəbi mühitinə təsirinin tədqiq olunmasını təklif edib.
Gürcü Ədəbiyyatı İnstitutunun direktor müavini filologiya elmləri doktoru, professor Maka Elbakidze isə öz növbəsində layihə çərçivəsində peşəkar mütəxəssislər tərəfindən təmsil etdiyi qurumun hazırlıq işləri barədə məlumat verərək musiqi, teatr, kino, ədəbiyyat və təsviri incəsənət sahələrini əhatə edən materialların artıq hazırlandığını, özünün də materialların redaktəsində iştirak etdiyini diqqətə çatdırıb.
Akademik İsa Həbibbəyli gürcü alimləri tərəfindən səsləndirilən təklifləri müsbət qarşılayıb, böyük Azərbaycan şairi Nizami Gəncəvi irsinin Avropa ədəbi-mədəni kontekstində öyrənilməsinin vacibliyini qeyd edib.
Görüşdə tərcümə və redaktə işlərinin yekunlaşdırılması, elmi materialların beynəlxalq nəşriyyatlara təqdim edilməsi və gələcək əməkdaşlığın istiqamətləri barədə də fikir mübadiləsi aparılıb.
Çıxışlardan sonra qarşılıqlı hədiyyələr təqdim olunub, xatirə şəkilləri çəkdirilib.
Daha sonra qonaqlar Elmin populyarlaşdırılması şöbəsinin təşkilatçılığı ilə AMEA-nın Rəyasət Heyətinin binası ilə tanış olublar.
Görüşdə Şota Rustaveli adına Gürcü Ədəbiyyatı İnstitutunun şöbə müdiri filologiya elmləri doktoru İvane Amirxanaşvili, eləcə də AMEA Rəyasət Heyəti aparatının İctimaiyyətlə əlaqələr, mətbuat və informasiya şöbəsinin müdiri filologiya üzrə fəlsəfə doktoru Ağahüseyn Şükürov və AMEA-nın Nizami Gəncəvi adına Ədəbiyyat İnstitutunun direktor müavini filologiya elmləri doktoru Mehman Həsənli də iştirak ediblər.
13:52 18.11.2026
Oxunuş sayı: 107