Ceyhun Bayramovla Almaniyanın xarici işlər naziri arasında təkbətək görüş başlayıb - YENİLƏNİB
Xarici işlər naziri Ceyhun Bayramov Azərbaycanda səfərdə olan Almaniyanın xarici işlər naziri Yohan David Vadeful ilə görüşüb.
Bu barədə Crossmedia.az-a Xarici İşlər Nazirliyindən məlumat verilib.
Qeyd olunub ki, görüşdə Azərbaycan-Almaniya münasibətlərinin cari vəziyyəti, ikitərəfli əməkdaşlığın inkişaf perspektivləri, habelə regional və beynəlxalq məsələlər müzakirə olunub.
Gələn il Azərbaycan və Almaniya arasında diplomatik münasibətlərin qurulmasının 35-ci ildönümünün qeyd ediləcəyi məmnunluqla xatırlanaraq, iki ölkənin liderləri səviyyəsində təmasların mövcud strateji tərəfdaşlıq gündəliyinin formalaşdırılmasında müstəsna rolu vurğulanıb.
Siyasi dialoqun, o cümlədən Xarici İşlər Nazirlikləri arasında siyasi məsləhətləşmələrin ölkələrimiz arasında qarşılıqlı etimadın möhkəmləndirilməsi, ikitərəfli gündəliyin aktual məsələlərinin nəzərdən keçirilməsi və yeni əməkdaşlıq imkanlarının müəyyənləşdirilməsi baxımından əhəmiyyəti qeyd olunub.
İqtisadi əməkdaşlığın münasibətlərin əsas istiqamətlərindən biri olduğuna diqqət çəkilib, ticarət dövriyyəsinin artım dinamikası, Almaniya şirkətlərinin Azərbaycandakı fəaliyyəti, investisiya imkanları və biznes əlaqələrinin genişləndirilməsinin əhəmiyyəti vurğulanıb.
Enerji sahəsində əməkdaşlığın, o cümlədən Azərbaycanın Almaniyaya qaz ixracına başlamasının münasibətlərdə yeni mərhələ açdığı qeyd edilib. Sənaye, kənd təsərrüfatı, nəqliyyat, tikinti və texnologiyalar sahələrində əməkdaşlıq perspektivlərinə toxunulub.
Azərbaycan ilə Almaniya arasında həm sərnişin, həm də yük daşımaları məqsədilə uçuşların və onların təyinat məntəqələrinin sayının artırılması imkanları nəzərdən keçirilib.
Almaniya şirkətləri Orta Dəhliz, Bakı Beynəlxalq Dəniz Ticarət Limanı və Ələt Azad İqtisadi Zonasının yaratdığı imkanlardan faydalanmağa, habelə işğaldan azad edilmiş ərazilərdəki bərpa və yenidənqurma layihələrində iştiraka dəvət edilib.
Humanitar sahədə əlaqələrin, xüsusilə təhsil, elm, mədəniyyət, turizm və regionlararası əməkdaşlığın xalqlar arasında qarşılıqlı anlaşmanın gücləndirilməsində roluna toxunulub.
Almaniyanın ali təhsil müəssisələrində çox sayda azərbaycanlı tələbənin təhsil alması məmnunluqla qeyd olunub, ali məktəblər, o cümlədən texniki təhsil ocaqları arasında mübadilələrin genişləndirilməsi, Azərbaycanda alman dilinin tədrisi imkanlarının artırılması və eləcə də Azərbaycan-Almaniya Universitetinin təsisi perspektivləri ətrafında fikir mübadiləsi aparılıb.
Azərbaycanda tarixən mövcud olmuş alman icmalarının irsinin ikitərəfli münasibətlərin mühüm mədəni bağlarından biri olduğu qeyd edilib.
Beynəlxalq təşkilatlar çərçivəsində əməkdaşlıq, regional məsələlər, Cənubi Qafqazda mövcud vəziyyət və Azərbaycan-Ermənistan münasibətlərinin normallaşdırılması prosesi barədə fikir mübadiləsi aparılıb.
Nazir Ceyhun Bayramov Azərbaycanın işğaldan azad edilmiş ərazilərində həyata keçirilən bərpa və quruculuq işləri, keçmiş məcburi köçkünlərin doğma yurdlarına qayıdışı və mina təhlükəsinin yaratdığı çətinliklər barədə həmkarına məlumat verib.
Nazirlər tərəfindən Şərqi Avropa və Yaxın Şərq regionlarında davam edən münaqişələrin siyasi dialoq və diplomatik danışıqlar yolu ilə həllinin vacibliyinə dair həmfikirlik ifadə olunub.
Görüş zamanı həmçinin qarşılıqlı maraq doğuran digər ikitərəfli və regional məsələlər ətrafında fikir mübadiləsi aparılıb.
10:32
Azərbaycanın xarici işlər naziri Ceyhun Bayramov və Almaniyanın xarici işlər naziri İohan David Vadeful geniş tərkibdə görüş keçiriblər.
Crossmedia.az xəbər verir ki, görüşdə Azərbaycan-Almaniya münasibətlərinin hazırkı vəziyyəti, ikitərəfli əməkdaşlığın genişləndirilməsi perspektivləri, həmçinin regional və beynəlxalq gündəmdəki əsas məsələlər müzakirə olunub.
Nazirlər 2027-ci ildə diplomatik münasibətlərin qurulmasının 35-ci ildönümünün qeyd olunacağını nəzərə alaraq, qarşılıqlı hörmət, konstruktiv dialoq və ortaq maraqlar əsasında tərəfdaşlığın inkişaf etdirilməsinin vacibliyini vurğulayıblar.
Bildirilib ki, 2026-cı ilin iyulunda Azərbaycan Prezidentinin Almaniyaya rəsmi səfəri zamanı qəbul edilmiş İkitərəfli Tərəfdaşlıq üzrə Strateji Gündəliyi münasibətlərin inkişafı üçün mühüm çərçivə yaradır.
Görüşdə iqtisadi əlaqələrin gücləndirilməsinə xüsusi diqqət yetirilib. 2025-ci ildə iki ölkə arasında ticarət dövriyyəsinin 1,4 milyard dollar təşkil etdiyi, Azərbaycanın Almaniyaya qaz ixracına isə 2026-cı ilin yanvarında başladığı qeyd olunub.
Tərəflər ticarət, investisiya, enerji, sənaye, nəqliyyat və texnologiya sahələrində əməkdaşlığın genişləndirilməsi imkanlarını müzakirə ediblər. 2026-cı ilin iyulunda Azərbaycan-Almaniya Biznes Şurasının yaradılmasının iki ölkənin biznes dairələri arasında əlaqələr üçün yeni platforma olduğu vurğulanıb.
Ceyhun Bayramov Almaniya şirkətləri üçün Orta Dəhlizin, Ələt Azad İqtisadi Zonasının, Bakı Beynəlxalq Dəniz Ticarət Limanının, eləcə də Azərbaycanın işğaldan azad edilmiş ərazilərində həyata keçirilən yenidənqurma və inkişaf layihələrinin yaratdığı imkanlardan danışıb.
Nazirlər Azərbaycan-Ermənistan normallaşma prosesi də daxil olmaqla regional məsələlər və beynəlxalq təşkilatlar çərçivəsində əməkdaşlıq barədə fikir mübadiləsi aparıblar. Ceyhun Bayramov işğaldan azad edilmiş ərazilərdə yenidənqurma işləri, keçmiş məcburi köçkünlərin geri qayıdışı və mina təhlükəsinin yaratdığı çətinliklər barədə məlumat verib.
Görüşdə təhsil, mədəniyyət və elm sahələrində insanlararası əlaqələrin gücləndirilməsinin əhəmiyyəti də qeyd olunub.
09:58
Azərbaycanın xarici işlər naziri Ceyhun Bayramovla Almaniyanın xarici işlər naziri İohan Vadeful arasında ikitərəfli görüş başlayıb.
Crossmedia.az xəbər verir ki, görüş Azərbaycan Xarici İşlər Nazirliyində keçirilir.
09:54
Azərbaycanın xarici işlər naziri Ceyhun Bayramov Almaniyanın xarici işlər naziri İohan Vadefulla görüşüb.
Crossmedia.az xəbər verir ki, bu barədə Azərbaycan Xarici İşlər Nazirliyinin “X” hesabında paylaşım edilib.
Qeyd olunub ki, İohan Vadeful Azərbaycan Xarici İşlər Nazirliyində Ceyhun Bayramov tərəfindən qarşılanıb.
14:25 18.11.2026
Oxunuş sayı: 191