Ölkəmizə, dövlətimizə və milli ləyaqətimizə qarşı təhdidlərə susmayaq!
Son zamanlar Türkiyədən sosial şəbəkələr vasitəsilə Azərbaycan dövlətinə, hakimiyyətinə, dövlət məmurlarına və şəxsən ölkə başçısına qarşı səsləndirilən təhdidlərin və təzyiqlərin azalacağını düşünürdük. Təəssüf ki, gözlədiyimizin əksinə, bu cür hallar davam etməkdədir.
Crossmedia.az xəbər verir ki, artıq məsələ elə bir həddə çatıb ki, Azərbaycana qarşı yönəlmiş siyasi xarakterli hücumlar heç bir əlaqəsi olmayan sosial şəbəkə səhifələrinin, hətta ictimai və humanitar fəaliyyətlə məşğul olan təşkilatların paylaşımlarının altında da özünü göstərir.
Təəssüf doğuran məqamlardan biri də odur ki, Azərbaycan Autizm Assosiasiyasının sosial şəbəkə hesabındakı paylaşımların şərh bölməsində belə Azərbaycan dövlətinə, hakimiyyətinə və ölkə rəhbərliyinə qarşı təhdid və təhqir xarakterli fikirlərə rast gəlinir.
Biz indiyədək imkanlarımız daxilində bu cür hücumlara cavab vermiş, ölkəmizin və dövlətimizin maraqlarını müdafiə etməyə çalışmışıq. Lakin hesab edirəm ki, artıq bu məsələyə daha ciddi yanaşmağın, bir növ həyəcan siqnalı verməyin vaxtı çatıb.
Söhbət artıq ayrı-ayrı şəxslərin sosial şəbəkələrdə mübahisəsi deyil, ölkəmizə, dövlətçiliyimizə və milli maraqlarımıza qarşı yönələn təhdidlərə münasibətimizdən gedir.
Hesab edirəm ki, bu məsələdə Azərbaycan vətəndaş cəmiyyəti institutları, qeyri-hökumət təşkilatları, ictimai birliklər, siyasi partiyalar, siyasətçilər, jurnalistlər, blogerlər və sosial şəbəkələrdə aktiv fəaliyyət göstərən bütün vətəndaşlarımız ortaq mövqe nümayiş etdirməlidirlər.
Biz siyasi baxışlarımızdan, fərqli düşüncələrimizdən və mövqelərimizdən asılı olmayaraq, Azərbaycan dövlətinə və ölkəmizin milli maraqlarına qarşı yönələn təhdidlər məsələsində prinsipial olmalıyıq.
Türkiyə xalqına, Türkiyə dövlətinə və qardaşlığımıza münasibətimiz bəllidir. İki ölkə arasında tarixi dostluq və qardaşlıq münasibətlərini ayrı-ayrı şəxslərin sosial şəbəkələrdəki aqressiv davranışları ilə eyniləşdirmək də doğru deyil. Bizim etirazımız hər hansı xalqa və ya dövlətə deyil, Azərbaycanı hədəf alan təhdidlərə, təhqirlərə və düşmənçilik çağırışlarına yönəlib.
Azərbaycanın dövlətçiliyinə, suverenliyinə və milli maraqlarına qarşı yönələn heç bir təhdidə biganə qala bilmərik!
Gəlin, bu məsələdə vahid ictimai mövqe formalaşdıraq. Hüquqi çərçivədə, faktlara əsaslanaraq, təmkinlə, lakin qətiyyətlə mövqeyimizi ortaya qoyaq. Təhdidləri sənədləşdirək, aidiyyəti qurumlara çatdıraq və sosial şəbəkələrdə ölkəmizin həqiqətlərini müdafiə edək.
Bu, hər hansı siyasi qüvvənin deyil, Azərbaycan dövlətinə və milli maraqlarına hörmət edən hər bir vətəndaşın məsələsidir.
Dövlətimizə sahib çıxmaq yalnız sözlə deyil, həm də vətəndaş məsuliyyəti, birlik və prinsipial mövqe ilə mümkündür!
Azərbaycan bizim Vətənimizdir. Onun dövlətçiliyini, suverenliyini və milli ləyaqətini qorumaq hər birimizin məsuliyyətidir.
Birliyimiz gücümüz, dövlətimiz dayağımızdır!
Elnur Məmmədli
Azərbaycan Autizm Assosiasiyası və Türk Dövlətləri Autizm Federasiyasınln rəhbəri
15:03 15.11.2026
Oxunuş sayı: 75