"OpenAI" CEO-su Sem Altman ailədaxili məhkəmə iddiası ilə gündəmdədir
Süni intellekt sektorunun aparıcı simalarından biri və "OpenAI"-ın CEO-su olan Sem Altman, ailədaxili bir məhkəmə iddiası ilə gündəmə gəlib. Altmanın bacısı Enni, qardaşına qarşı müxtəlif iddialarla hüquqi proses başladıb. Bu hadisə, texnologiya dünyasının ən diqqət çəkən şəxslərindən biri olan Altmanın şəxsi həyatını ictimai müzakirələrə çıxarıb. Bəs, Enni niyə qardaşına qarşı iddia qaldırıb?
Enni, Sem Altmana qarşı açdığı məhkəmə işində ciddi ittihamlar irəli sürüb. Ən diqqət çəkən iddialardan biri, uşaqlıq dövründə Altmanın ona qarşı cinsi təcavüz etdiyinə dair ittihamdır. Ailə üzvləri isə bu iddiaları qətiyyətlə rədd edərək, Ennin son dövrlərdə ittihamlarının dəyişdiyini və müxtəlifləşdiyini bildiriblər. Ailə, Ennin keçmişdə də digər şəxslərə qarşı oxşar ittihamlar irəli sürdüyünü qeyd edib.
Ailə tərəfindən verilən açıqlamada, Ennin illərdir müxtəlif çətinliklərlə üzləşdiyi və ona həm maddi, həm də mənəvi dəstək göstərildiyi vurğulanıb. Açıqlamada qeyd olunub: “Enniyə hər ay müntəzəm olaraq maliyyə yardımı edilib, tibbi xərcləri qarşılanıb və təhlükəsiz yaşayış mühiti üçün mülk ayrılıb.” Bununla belə, Enni ailəsinə qarşı ittihamlarını davam etdirərək qardaşını və digər ailə üzvlərini hədəf alıb.
Ennin irəli sürdüyü ittihamlar arasında maliyyə hüquqlarının pozulması, internetə çıxışının məhdudlaşdırılması və ailə tərəfindən izlənilməsi kimi iddialar yer alır. Altman ailəsi isə bu ittihamların tamamilə əsassız olduğunu bildirərək açıqlama verib: “Bu vəziyyət ailəmizi dərin şəkildə kədərləndirir. Ennin ehtiyac duyduğu yardımı almasını və sülh içində yaşamasını ümid edirik.”
Emil Nağızadə
13:26 08.01.2025
Oxunuş sayı: 3379
