Yaşlılara robotlar qulluq edəcək
Yaponiyada əhalinin sürətlə qocalması və baxıcı çatışmazlığı texnologiya sektorunda innovativ yanaşmaların ortaya çıxmasına səbəb olub. Ölkə qocalar evlərində və evdə qulluq xidmətlərində robot texnologiyalarından istifadəni genişləndirərək, həm yaşlıların həyat keyfiyyətini yüksəltməyi, həm də işçi çatışmazlığı problemini aradan qaldırmağı hədəfləyir.
Məsələn, Aeolus Robotics şirkəti CES 2023 sərgisində təqdim etdiyi Aeo adlı robotla diqqət çəkib. Aeo robotu dərman və qida çatdırmaq, səthləri dezinfeksiya etmək və insanları tanımaq kimi funksiyalara malikdir. Yaponiyada 2018-ci ildən istifadədə olan bu robot, qocalar evlərində işçilərin yükünü azaltmaqda mühüm rol oynayır.
Digər bir yenilik isə emosional dəstək verən robotlarla bağlıdır. Araşdırmalara əsasən, "Baymax" kimi hazırlanmış robotlar insan emosiyalarını tanımaq və müvafiq reaksiyalar göstərmək qabiliyyətinə sahib olacaq. Alimlər, bu texnologiyanın yaşlılara ev şəraitində müstəqil yaşamaq imkanı yaratdığını və qulluq xərclərini azaltdığını bildirirlər.
Yapon hökuməti, 2025-ci ilə qədər 370,000 baxıcı çatışmazlığı problemini həll etmək üçün robot texnologiyalarına böyük sərmayələr yatırır. Xüsusilə, qocalar evləri üçün inkişaf etdirilən reabilitasiya və monitorinq robotları xidmət keyfiyyətini artırmaqla yanaşı, sosial problemlərin həllinə dəstək verir.
Robot texnologiyalarının sosial təsirləri ilə yanaşı, iqtisadi faydaları da diqqət çəkir. Bu texnologiyalar yalnız yaşlılara qulluq üçün deyil, həm də səhiyyə sektorunda geniş tətbiq oluna bilən həllər təqdim edir.
Yaponiyanın bu sahədəki təcrübəsi, xüsusilə qocalma problemlərinin artdığı digər cəmiyyətlər üçün nümunə ola bilər.
Emil Bağızadə
10:44 08.01.2025
Oxunuş sayı: 4369
