Texnologiya
Tesla tarixində bir ilk: Satışlar ilk dəfə gerilədi!
Elektrikli nəqliyyat vasitələri dünyasının liderlərindən biri olan Tesla, 2024-cü ildə ilk dəfə illik satışlarda azalma ilə üzləşib.
Tesla, 2024-cü ilin son rübündə 495 min 570 avtomobil sataraq rüblük rekord qırsa da, bu performans illik hədəfləri qarşılamaq üçün kifayət etmədi. Şirkətin dördüncü rüb satışları Wall Street gözləntilərinin gerisində qaldı və istehsal rəqəmləri də bu dövrdə tədarük göstəricilərinin aşağısında qaldı. Tesla-nın ən böyük bazarlarından biri olan ABŞ-da isə elektrikli avtomobillərə olan ümumi tələbin zəiflədiyi müşahidə edildi.
Tesla-nın uzun illərdir davam edən elektrikli avtomobil liderliyi, xüsusilə Çin mərkəzli BYD kimi rəqiblərin bazarda güc qazanması ilə təhlükə altına düşüb. BYD, 2024-cü ildə satışlarını 41% artıraraq 1,77 milyon elektrikli avtomobil satışı həyata keçirdi və Tesla-ya kifayət qədər yaxınlaşdı. Tesla-nın məhdud model çeşidi və artan rəqabət bu geriləmədə mühüm rol oynayıb.
Mütəxəssislərə görə, Tesla-nın böyüməyə davam edə bilməsi üçün yeni və daha münasib qiymətli modellər hazırlaması vacibdir. Şirkətin hazırkı Model 3 və Model Y avtomobilləri ümumi satışların böyük hissəsini təşkil edir. Daha bahalı Model S, Model X və yeni Cybertruck modelləri isə aşağı satış rəqəmləri ilə diqqət çəkir.
Tesla-nın 35 min dollar ətrafında qiymətləndiriləcək Model Y variantı üzərində işlədiyi bildirilir. Bu addım, Tesla-nı lüks avtomobil seqmentindən çıxararaq daha geniş bir istehlakçı kütləsinə xitab etməsinə kömək edə bilər.
Nərgiz Camalzadə
15:59 03.01.2025
Oxunuş sayı: 11826
