Apple 95 milyon dollar ödəyəcək
ABŞ-ın texnologiya nəhənglərindən olan Apple, səs köməkçisi texnologiyası "Siri"nin istifadəçilərin məxfiliyini pozduğuna görə 95 milyon dollar ödəməyə razılaşıb. Bu barədə məhkəmə qətnamə qəbul edib.
Məhkəmə iddiası “Siri”nin istəmədən aktivləşdirildiyi, istifadəçilərin söhbətlərinin onların razılığı olmadan üçüncü şəxslərə verildiyi iddiası ilə açılıb. Apple əvvəlcə ittihamları rədd etsə də, sonradan razılaşaraq 95 milyon dollar ödəməyə razılaşıb. Məsələ təsdiq olunarsa, “Siri” ilə işləyən cihazların istifadəçiləri hər cihaz üçün 20 dollara qədər ödəniş ala biləcəklər.
Qərarın icrası 17 sentyabr 2014-cü il və 31 dekabr 2024-cü il tarixləri arasında Siri ilə işləyən iPhone, iPad, Apple Watch, MacBook, iMac, HomePod, iPod touch və ya Apple TV-yə sahib olan ABŞ istifadəçilərini əhatə edəcək. “Siri” səsli köməkçi texnologiyası ilk dəfə 2011-ci ildə buraxılan iPhone 4S modellərinə daxil edilib. İstifadəçilərə "Siri"-ni səssiz rejimdə aktivləşdirməyə imkan verən "Hey Siri" funksiyası 2014-cü ildə təqdim edilib.
04:14 03.01.2025
Oxunuş sayı: 7462
