Kiyevdə “Şahed” yaşayış binasına çırpıldı: 14 yaşlı yeniyetmə öldü
Rusiyanın sentyabrın 25-də Ukraynaya həyata keçirdiyi genişmiqyaslı dron hücumu nəticəsində Kiyevdə 14 yaşlı yeniyetmə həlak olub, yaralananların sayı isə son məlumatlara görə 9 nəfərə çatıb.
Crossmedia.az xəbər verir ki, Ukrayna polisinin məlumatına əsasən, pilotsuz uçuş aparatı Kiyevin Peçersk rayonunda 16 mərtəbəli yaşayış binasına çırpılıb. Zərbə nəticəsində 14 yaşlı oğlan həyatını itirib, Peçersk rayonunda azı 7 nəfər yaralanıb. Sonradan şəhər üzrə yaralıların ümumi sayının 9-a yüksəldiyi bildirilib.
Ukrayna Hərbi Hava Qüvvələrinin məlumatına görə, gecə və səhər saatlarında ölkəyə ümumilikdə 295 müxtəlif tipli pilotsuz uçuş aparatı buraxılıb. Onlardan 267-nin vurulduğu və ya elektron vasitələrlə zərərsizləşdirildiyi, 16 müxtəlif ərazidə isə zərbələrin qeydə alındığı bildirilib.
Hücumlar Odessa vilayətində də insan tələfatına səbəb olub. Yerli prokurorluğun məlumatına görə, bölgədə 40 yaşlı qadın həlak olub, iki kişi yaralanıb. Zərbələr nəticəsində poçt terminalı, anbarlar və yaşayış obyektlərinə ziyan dəyib.
14:17 25.09.2026
Oxunuş sayı: 41
