Avropa İttifaqında universal şarj cihazları ilə bağlı qanun qüvvəyə mindi
Avropa İttifaqı tullantıları azaltmaq və istehlakçıların xərclərini minimuma endirmək məqsədilə yeni qanun qəbul edib. Bu qanuna əsasən, şənbə günündən etibarən elektron cihaz istehsalçıları bütün cihazları USB-C şarj portu ilə təchiz etməlidirlər. Bununla istehlakçılar hər cihaz üçün ayrı şarj cihazı almaq məcburiyyətindən qurtulacaq.
Yeni qaydalar bütün smartfonlar, planşetlər, kameralar, qulaqlıqlar, dinamiklər və digər cihazlara şamil edilir. Brüssel bildirir ki, bu dəyişiklik həm iqtisadi xərcləri azaldacaq, həm də tullantıların həcmini minimuma endirəcək. Avropa Parlamenti sosial media platformasında etdiyi paylaşımda bugündən etibarən bütün yeni cihazların USB Type-C şarj portu ilə təmin edilməli olduğunu vurğulayıb.
Qanun ilk dəfə 2022-ci ildə təsdiq edilib. Şirkətlərə bu qaydaya uyğunlaşmaq üçün 28 dekabr 2024-cü ilə qədər vaxt verilmişdi. Bununla yanaşı, noutbuk istehsalçılarına uyğunlaşma üçün 2026-cı ilin əvvəlinə qədər əlavə müddət ayrılıb.
ABŞ texnologiya nəhəngi Apple isə bu tənzimləməyə ilk vaxtlar qarşı çıxaraq, onu "innovasiyaları məhdudlaşdırmaqda" ittiham etmişdi. Lakin 2023-cü ilin sentyabrından şirkət USB-C şarj portuna keçid edib və bu tələbi yerinə yetirməyə başlayıb.
Avropadakı elektronika istehsalçıları artıq on il əvvəl vahid şarj cihazı norması ilə bağlı razılığa gəlmişdilər. Yeni qaydalar həm ekoloji problemlərin həllinə töhfə verəcək, həm də istehlakçılar üçün daha rahat və qənaətli bir sistem yaradacaq.
Sevinc Abuşova
18:06 28.12.2024
Oxunuş sayı: 16959
