Gündəm

Hacıyev: Azərbaycan–Keniya əməkdaşlığında böyük potensial var

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Bakı ilə Nayrobi arasında əməkdaşlığın inkişafı üçün geniş imkanların mövcud olduğunu bildirib.

Crossmedia.az xəbər verir ki, o, Bakıda keçirilən Ümumdünya Şəhər Forumu (WUF13) çərçivəsində jurnalistlərə açıqlamasında Azərbaycan və Keniya arasında siyasi, iqtisadi və humanitar sahələrdə əməkdaşlığın genişlənməkdə olduğunu qeyd edib.

Hacıyev bildirib ki, Keniya Prezidenti Uilyam Rutonun Azərbaycana səfəri ikitərəfli münasibətlərin inkişafına mühüm töhfə verib və artan əməkdaşlığın göstəricisidir.

Onun sözlərinə görə, iki ölkə arasında investisiya və ticarət sazişləri üzərində iş aparılır və müxtəlif sahələrdə təcrübə mübadiləsi üçün böyük potensial mövcuddur.

Hacıyev, həmçinin Keniya hökumətinin mənzil layihəsi sahəsində əldə etdiyi nailiyyətləri yüksək qiymətləndirib və bu istiqamətdə qarşılıqlı öyrənmənin vacibliyini vurğulayıb.

Sonda o qeyd edib ki, Keniya BMT sistemində mühüm rol oynayan ölkələrdən biridir və bu amil də əməkdaşlıq üçün əlavə imkanlar yaradır.

🖨 Çap et

16:13 22.05.2026

Oxunuş sayı: 121